Isaya 33 - Ebibulia 2001

Enshara y'okushaba obujuni

¹ Zabalya inywe abaita abantu, okwo inywe taliho abaita. Mwafa inywe abagobeza banu, okwo inywe taliho muntu abagobeza! Orwo mulilekera kwita abantu, mumanye okwo inywe aho mwaitwa. Orwo galibahwa ag'okugobeza abantu, mumanye okwo inywe babanza kubagobeza.

² Waitu Mukama, singa otuganyire, tutura tukulinzire. Buli bwankya obe mani gaitu, oturokore orwo tuli omu biyengo.

³ K'eiguru lisharuka, abantu bairuka, k'oimuka kuturashanira, amahanga genaganaga.

⁴ Aho nirwo ebyabo binyagwa bikatuumwa, bikashusha ebiyozi bituumangaine, okw'obona enzige nizichoka, nikwo abantu bachokera ebintu ebyo.

⁵ Omukama aba w'ekitinwa, aha rw'okuba asingiire owa kaleire; Omugorogoki mara omunyamazima alisingira Sioni.

⁶ Alitunga eihanga lyanyu emilembe nyakabara, abarokolere kimoi ashube abatunge amagezi n'obumanyi. Okutina Omukama nilyo liliba itunga lyanyu.

⁷ Muraleba abaisherukare babo tuli omu kigo nibakungera, ababaka babo ababaire nibahiga emilembe, nibachura eyobobo.

⁸ Nyarulembo zabaire matongo, abagenzi tibakizoka mu mihanda. Endagano zachwirwe, n'abajulizi b'endagano ezo nibagaywa, taliho n'omoi alikukunirwa.

⁹ Ensi telikulimwa, kandi teinamu bantu, ebibira bya Lebanoni byomire, oruhanga rwa Shaloni orweza rwabaire irungu, kandi omuli Bashani n'aha Ibanga lya Karimeli emiti nekunkumuka amababi.

Omukama natatira ababishabe

¹⁰ Omukama nagamba ati, “Mbwenu aha naija kwimuka, babone okwo ngira obushobora.

¹¹ Nimutegeka ebitaina ntege, n'ebyo mulikukora byona bya katozi. Inye mtuli ndi ninshusha omuliro, ninyija kubokya nkabamaraho.

¹² Nimwija kwatayatika nk'ebirobe ebyo bokize kwihyamu einoni, mushushe amahwa ago bokya gakasosotoka.”

¹³ Inywe atuli harai muhulire ekyo nkozire, nainywe atuli haihi mumanye okwo mba mushobora.

¹⁴ Abafakare atuli Sioni nibatina, abatatina Ruhanga nibajugumba, bakwese, “Eiramu lya Ruhanga nilishusha omuliro ogutarara eirai lyona.”

¹⁵ Wakurora, kawakugamba ekirungi mara okakikora. Otakoza bushobora bwawe kugobeza baanaku, kandi otakwenza bantu rushwa. Atulikwenda kwita abantu otabatahamu, n'atulikugonza kukora ebindi ebili bibi otayema nabo.

¹⁶ Aho nirwo oligira emilembe, oligira emilembe okwobon'oti oli omuboma egumire. Orabonaga ebyakulya olye; obone n'amaizi onywe.

Emilembe elikwija

¹⁷ Mulibona Omukama aina ekitinwa, n'ensi ey'alitwara eliba mpango muno.

¹⁸ Abashoza omushoro abanyamahanga, n'abanyomozi abo mutura nimutina, mulisigara okubaijuka kushai.

¹⁹ Abanyamahanga ab'eikuru, abagamba endimi ezo mutalikushobokerwa, muliba mutakibabona.

²⁰ Mulebe Sioni, ekigo ekyo tukoleramu amagenyi gaitu g'edini. Mulebe Yerusalemu! Neija kuba buturo bw'emilembe. Yerusalemu elishusha eihema elitakasimburwaga, ely'emambo ezitakanyukurwaga, n'emiguha yalyo tegutuka.

²¹ Omukama alisinga atwoleke ekitinwakye. Tulitura aha miiga mihango n'aha migera, kyonkai emeli z'ababisha tizilisabara mu miiga egyo, n'amaato chei.

²² Omukama n'iwe aba muramuzi waitu, n'iwe mutwazi waitu, n'iwe Rugaba rwaitu aliturokora.

²³ Emiguha y'emeli ezo elegukire, tekikoma mulingoti gukaguma; n'amatanga tekigaleega! Aho ebintu by'amahe g'ababisha, nitwija kubinyaga tukabibegana, nangu n'abalema nibaija kukwasaho, enshonga biraba bili bingi.

²⁴ Omu nsi yaitu taliho muntu alishuba kutaka burwaire, kandi amafu gona galigarulirwa.