Isaya 30 - Ebibulia 2001

Endagano na Misiri etaina nshonga

¹ Omukama nagamba ati, “Bagwerwa abashengi, atulikukora ebyo ntalikwenda, nibakora n'emikataba etalikunshemelera, nibakora obufu nibabutungika ahali bunu.

² Nibakwata omuhanda nibagya Misiri batamtulize. Nibairukira Farao kumugambira k'abemamu, nibagonza kuhungira omu mikono ya Misiri!

³ Mwagonza Farao kuba n'iwe abemamu, kyonkai muragoka; mwayenda kuhungira omu mikono ya Misiri, nawe nimwija kubona amahano.

⁴ N'orwo ababaka ba Farao baraba bagobire Zoani, n'entumwaze zagobire Hanesi;

⁵ buli muntu alyechuza ekyamusindikire kwesiga eihanga elitaina mtuli lili, eihanga elyo balebire kalibajuna likaburwa kubajuna; tulishonara, enshoni zibaite.”

⁶ Leba ekyo Ruhanga alikugamba aha nyamaishwa za Negebu: Ababaka nibaraba omu nsi y'akabi, ey'enaku n'obushasi, elikuturwamu entare, n'enjoka z'enchwera n'ezilikuharara, bahekesize endogobe emigugu, engamia bazitwekire emigugu aha mabango, nibagya omw'ihanga elitalibagasha kantu; shana libashonaze libagore.

⁷ Kuba obujuni bwa Misiri tibwina magoba, tibulikugasha; nikyo ensi egyo ndikugyetera eibara lya “Rahabu abutamire ahansi kushai.”

Eihanga litaina muhuliro

⁸ Mbwenu ogende ohandike ebigambo ebi aha mbengo, obihandike n'omu kitabo, buliba bujulizi bw'ebiro byona, omu makiro agalija.

⁹ Kuba nibaikara bashengire Ruhanga, buli kanya nibabeiya, taliho orwo tulikukunda kuhulira ebyo Omukama alikubegesa.

¹⁰ Nibatanga ababonekerwa kubonekerwa, n'abarangi nibatanga kubabaasira ebili by'amazima. Nibabagambira kubagambira ebitaina nshonga, bababaasire ebya katozi,

¹¹ nibabatanga okwikara tuli besigwa, titulikwenda kuhulira Omutakatifu wa Isiraeli nagambwa.

¹² Mbwenu Omutakatifu wa Isiraeli nagamba ati, “Ebyo ndikubagambira timubiliho, nimugonza muno okubeiya abantu n'okubashasa.

¹³ Muli babi. Muli nk'orukuta orurai, orwina orutanda kwema eiguru kugoba ahansi; orukuta orwab'orwo rulembekeleire kugwa, mara rugwa batamanyire.

¹⁴ Emigwere yarwo kumoi n'emyatikire y'enyungu, enyungu k'eyatika esinjagulika, tesigaraho ruguhyo rwa kutahuliraho muliro anga kutahisa maizi mw'iziba.”

¹⁵ Omukama Ruhanga, Omutakatifu wa Isiraeli akagamba ati, “Kamuligaruka mukatebekana mulirokoka, kamulichulera mukanyesiga muligira emilembe.” Kyonkai inywe timwaikiliize.

¹⁶ Mukagamba kukuuba efarasi ezilikwiruka muno, mukasiga ababisha. Nikwo, okwiruka murairuka musige ababisha! Inywe nimubona efarasi zanyu nizimanya kwirukakwo, kyonkai atulikwija kubabinga nibairuka kuzishaga.

¹⁷ Abantu rukumi muliiruka muboine omwisherukare omoi omubisha. Abaisherukare batanu bonkai nibamara okumara kubabona mukairuka inywena. Eihe lyanyu lilihwaho lyona, omuti gw'ebendera gwonkai nigwo gulisigara aha katwetwe k'orushozi.

¹⁸ Aha rw'ekyo Omukama naramisiliza kubagarulira. Nayenda kubaganyira akanya kona kona, kuba wenene aba murungi ebiro byona. Baberwa abesiga Omukama.

Ruhanga alitunga eihangalye omugisha

¹⁹ Inywe aba Sioni, inywe abatura Yerusalemu, timulichura rundi. Orwo mulitaka, Omukama alibahulira, abagilire ekisha abahorore.

²⁰ Omu naku zanyu zona Omukama alibemera. Timulimuhigiliza; wenene aliba Mwegesa wanyu.

²¹ Kamulinaga omuhanda, alibahondeza eiraka abagambire ati, “Omuhanda nigw'ogu; mube nigwo mukwata.”

²² Ebishushani byanyu ebibaijano ebisiigire efeza, n'ebiheshano ebisiigire ezahabu, mulibikwata mubinage okwo baanaga ebitokoire, nimugira muti, “Chwekamu kuli.”

²³ Orwo murakabibaga embibo, Omukama aragwisaga enjura, aho embibo ezo zimere, zirabe zishekeleze, kandi ebitunganwa byanyu nabyo bilibona obunyasi bungi.

²⁴ Omu makiro ago ente n'endogobe ezo muliba nimulimisa zililya ebyakulya ebirungi muno.

²⁵ Kiro ekyo ebigo by'eboma eby'ababisha banyu bilikwatwa n'abamwo bakaitwa, amabanga gona n'obushozi bwona bilitabukwamu emigera y'amaizi.

²⁶ Okwezi kulyaka nk'eizoba, kandi eizoba lyonene emyakire yalyo lilishagaho emirundi mushanju, okw'obon'oti mushana gw'ebiro mushanju gwajwa omu kiro kimoi. Ebi byona bilibaho orwo Omukama alisinga akashemba eihangalye amahuta ago yalihutaize akagakiza.

Ruhanga alibonabonyia Asiria

²⁷ Omukama naruga harai. Aina ekiniga kingi mara natinisa muno. Nagambisa ekiniga kingi. Orulimirwe nirushusha omuliro ogulikurabagira.

²⁸ K'alikwikya orwoya orulikumuruga omu nyindo nirushusha amaizi g'omwiga agalembeire agagoba omuntu omu ngoto. Amahanga naija kugaita akagabonabonyia, abantu akabakoma enkoba omu nshaya akabatwara mtuli batalikwenda.

²⁹ Nimwija kurara nimuzina okwo barara nibazina aha muro gw'obugenyi. Mushemelerwe okwo omuntu ahulira omulere akabanduka kuramagira aha Ibanga ly'Omukama, Orwazi rwa Isiraeli.

³⁰ Omukama araha buli muntu okuhulira eirakalye ely'amani n'ekinigakye ekingi. Abantu barabona endimi z'omuliro, enjura y'omuyaga n'orubare n'enjura y'ekinyamugera.

³¹ Abaasiria baratina orwo barahulira Omukama nagamba, bakabona n'okwo yaija kubateza enkoni.

³² Abaasiria abo Omukama araikara nababonesa enaku, kandi eihangalye liraikara omu kanyahwera, nibatera engoma n'enanga. Ruhanga wenene n'iwe aratera Abaasiria.

³³ Omwanya guhango guratekatekirwe kwema karai mtuli omuliro gulyokeza omukama wa Asiria. Kina kihango kili okuzimu, kijwire enkwi. Orwoya rutali ruke oruraruga Omukama omu nyindo nigwo muliro gw'obuganga ogurahemba enkwi ezo.