Isaya 28 - Ebibulia 2001

Abatwazi ba Efuraimu nibatatirwa

¹ Bagwerwa abatwazi entamiizi za Efuraimu, n'ekitinwa kyabo kyahwaho okw'obona orwakyo. Abatwazi b'eikuru besiigire amarasi omu mitwe, kyonkai leba, babaire mirambwe.

² Omukama aina omuntu ow'amani emanzi; aina amani nk'embuyaga y'orubare esilikya buli kantu, nashusha amayengo; naija kubakuntura ahansi.

³ Abatwazi abo ab'eikuru, entamiizi za Efuraimu nibaija kujungilirwa omw'itaka, nibazira eikuru lyabo.

⁴ Ekitinwa ky'abatwazi abo ab'eikuru, kirahwaho nk'etini ezihisa mbere, nizo zihisa ziti aho n'aho bakazinoga bakazilya.

⁵ Ekiro kilija orwo Omukama w'amahe alirokora abantube alibashusira orukinga rw'ekitinwa orw'amaua.

⁶ Atuliba nibakora omulimo gw'oburamuzi alibaha okumanya amazima, n'atuliba nitulinda ebihigi by'ekigo bitaterwa mubisha alibaha okugira obumanzi.

Isaya n'abarangi ba Yuda entamiizi

⁷ Nangu n'abarangi n'abakuhani nibatamiira, nibatarambukana. Batamiire edivai n'amarwa, byabamara amagezi, nibataratara. Abarangi batamiire muno, tibaina na gashobokerwa byo Ruhanga alikuboleka. Abakuhani nabo batamiire muno, tibaina garamura mishango eyo tulikubaletera.

⁸ Emeza zona ezo bashuntamireho zijwire entanaki, taliho mtuli zitatokoire n'akake.

⁹ Nibanjuma bati, “Omuntu ogwo ebyo alikwegesa nabishobokerwa? N'ohai alikwetaga kumuhulira ebyo alikugamba? Ebyo bisaine enchuke!

¹⁰ Wenene nagonza kutwegesa buli kantu, nka yatwisa orube!”

¹¹ Kamurayanga kumpuliliza, Ruhanga arakoza abanyamahanga bakoze endimi ezo mutalikumanya, babe nibo babegesa mukahulira.

¹² Akabatunga emilembe mwaikarage, kyonkai mwayanga kumuhuliliza.

¹³ Niyo nshonga Ruhanga naija kubegesa buli kantu, mulemwe mubikwate. Mushube mutambuke nimusitara, mugwe omu mitego, muhutare, bashube babatware endore.

Eibare ly'epembe lya Sioni

¹⁴ Mbwenu inywe batwazi b'eikuru atulikutwara eihanga eli omuli Yerusalemu, huliliza ebyo Omukama alikugamba.

¹⁵ Nimugamba okwo mutalikutina rufu, kamwakufa mufa. Nimwebeiya okwo mutabe kantu orwo ekibundo kiratera.

¹⁶ Mbwenu Ruhanga nagamba ati, “Omuli Sioni ninyombekamu omusingi gw'amani ogugumire. Nagutamu eibare ly'epembe ely'enyondobare elihandikirweho ebigambo biti, ‘Ayesiga tagira rwekanasho.’

¹⁷ Amazima nigwo muguha gwange gw'okugupimisa, kandi obwesigwa niyo kabiro yange.” Enjura y'orubare erahyeya ebishuba byona ebyo mwemeleireho, kandi omutunga gw'amaizi tigubagize bwikarage.

¹⁸ Mbwenu orufu orwo mutakitina murabanza kurutina, kuhulira okwo mwaija kufa mugwe omu rujugumbo. K'ekibundo kiratera muratina kubi,

¹⁹ kiraikara nikibatera, buli kiro, kibaimukiremu. Kiro na mushana tikilibaburaho. Buli kigambo ekyo Ruhanga arata kubaragiraho kirata kubatinisa!

²⁰ Murashusha owo bachwireho omugani, ayabyamire aha kitanda kigufi akarara ayefunyire, akeshweka orubamtuli rw'akalingiti.

²¹ Endashana y'Omukama neija kushusha eyo yarashaniire aha Ibanga lya Perazimu, n'omu Ruhanga rwa Gibeoni, ayenzire kukora ekyo araliire, atangaze ensi. Omulimogwe ogw'ekyebisho naija kugugobesheleza.

²² Ndeke kubatatira mukasheka! Mbatatire musheke, kyonkai murafa. Omukama Ruhanga w'amahe inye muhuliire, naralira kusilikya ensi yona.

Obumanyi bwa Ruhanga

²³ Muhulilize ebyo ndikugamba; mubihulilize.

²⁴ Taliho mulimi aikara nalima ndimiroze kugir'oti orwo yalima naija kubiba.

²⁵ K'amara kwanjara abibamu enkore n'enkuku, abibamu n'engano omu njuru, n'eshayiri agibiba hayo agoba omu mbibi.

²⁶ Emikolere y'omulimogwe nagimanya kuba akagyegesibwa Ruhanga.

²⁷ K'aija kutera enkore n'enkuku takwata nkoni ya mufufu, shana akwata enkoni elengeleire ey'okuteza emyaka eyab'egyo.

²⁸ Emyaka tagitera kurabanganayo kulemwa akagiita. Namanya okwo aratera emyakaye narabyamu egali, kyonkai yonene emyakaye atagiisire.

²⁹ Omukama w'amahe n'iwe ntabuko y'obumanyi obu bwona. Entegeka za Ruhanga ziba z'obumanyi, mara rwona rwona zigoshoka.