Isaya 26 - Ebibulia 2001

Ruhanga aliha abantube okusinga endashana

¹ Kiro kilinya omu nsi ya Yuda tulihoya oruhoya oru, bati, “Twina ekigo ekigumire, Ruhanga n'iwe Murokozi wakyo, okw'obona ensika n'eboma.

² Mukingure ebihigi, eihanga ly'abantu abagorogoki, abesigwa batahe omu kigo ekyo.

³ Waitu Mukama, omuntu aikara akwetaireho, akakwesiga, omutunga emilembe nyakabara agigumamu.

⁴ Mwesigire kimoi Omukama, orw'okuba Omukama Ruhanga n'iwe aba Rwazi nyakumelera.

⁵ Ab'eikuru abateire aha mutwe, ekigo ky'amani ekyo baturagamu yakisilikya. Eboma zayo azikumbize, zasabara ahansi zasesetuka.

⁶ Ababaire tuli omu naku, nimwo tulikweyagarulira, nibakikandagilira.”

⁷ Abagorogoki baikarage, nyakatetere amutunga oburora bw'emilembe.

⁸ Waitu Mukama, katukore eby'olikwenda, mara tugire eshubi omuli iwe, manya iwe wenkai n'iwe twetaga.

⁹ Omu kiro ndaara nondamaiza, ndaara nintekeleza iwe mushai, kuba orwo oliramura ensi n'abantu bamwo, nirwo tulimanya obugorogoki buba kintuki.

¹⁰ N'orwo ababi obabera mufura, omubi ogwo obugorogoki tabumanya. N'orwo ali omu nsi y'abagorogoki, wenene nazigilira kukora kubi, takunda kumanya okwo oba muhango.

¹¹ Abakunoba tibamanya okwo olikubabonabonyia, waitu, singa obashonaze mara bashashe, oboleke okwo abantu bawe obagonza muno.

¹² Mukama orasinga oturamukye, manyasi ebyo tukora byona biba bikozirwe iwe.

¹³ Mukama Ruhanga waitu, tutura tutwarwa banu, kyonkai iwe wenkai n'iwe oba Mukama waitu.

¹⁴ Bafire, tituligaruka ruguru, babaire bizimu, titulihimbuka. Obabonabonize balemwa baba batyo, wabebesheza kimoi omu bantu.

¹⁵ Waitu Mukama, eihanga lyaitu olitungire amani, ensi yaitu wagihanguhya embaju zona.

¹⁶ Waitu Mukama, kawabonabonyize abantu bawe, bakamanya okwo enaku zishusha aho bakwetaho, bakushaba n'amani.

¹⁷ Waitu Mukama okatuchuza, twashusha okwo omukazi arumwa akataga.

¹⁸ Tukashasha, twashaga nk'abaina enda, kyonkai titwazaire mwana. Titwafa garokora nsi yaitu mu mikono ya babisha, taliho ihanga na limoi elyo tusingire.

¹⁹ Abawe abafire tulirora, tulihimbuka, inywe abaziikirwe omu nyanga muhimbuke muzine akanyahwera. Okw'obona orume rwa bwankya ruhaire ensi amagara, nikwo Omukama alihimbura abafire eirai.

Eiramu n'okuhimbuka

²⁰ Inywe bantu bange, mutahe omu maju ganyu mwekingiranemu, Ruhanga abanze atukurugukemu ekiniga.

²¹ Omukama naija kuruga omu busingirobwe omw'iguru, aije omu nsi kubonabonyia abantu nabatura amafu gabo. Abaisire abantu omu nsi bakesheleka, nabasherura, na mtuli babaziikire haramanyika.