Isaya 25 - Ebibulia 2001

Oruhoya rw'esiimi

¹ Waitu Mukama n'iwe oba Ruhanga wange, ndakusingizaga nkuhaisilize, ahakuba okozire eby'okutangaza, ebyo wagendeleire kwema karai bibakwo mara by'amazima.

² Ekigo okihindwire ntuumiro y'amabare, wakikambura kyasigara amatongo. Ekikaare ky'abanyamahanga tikikili kigo, kandi tikilishuba kwombekwa bundi buhya.

³ Nikyo amahanga g'amani galikuhera ekitinwa, n'omu bigo by'amahanga agakatili abantu tulikutina.

⁴ Omunaku n'omukene obabeleire kigo ky'eboma omu naku zabo, wababera bwegamo enjura y'amani egwire, wababera kibeho omushana gw'amani gujwire. Aha rw'okuba abakatili babatera, okw'omuyaga gw'amani gusindika orukuta.

⁵ Nk'okwo omushana gushumbura ensi eyomire, wasiza abanyamahanga, nk'okwo ekibeho ky'ekichwi kihumbya omushana, nikwo wasiza eyombo y'abantu abakatili.

Ruhanga natekateka obugenyi

⁶ Aha Ibanga eli lya Sioni Omukama w'amahe alikoleraho amahanga gona obugenyi, obugenyi bw'edivai enungi muno n'ebyakulya ebishaire.

⁷ Aha niho alihiraho amahanga gona obujune.

⁸ Orufu alirumaraho limoi limoi. Wenene Omukama Ruhanga aliragaza abantu bona amalira, n'abantube abaihyeho enshoni ezamanyikire omu nsi zona; Omukama wenene ekigambo eki n'iwe akigambire.

⁹ Kir'ekyo abantu tuligamba bati, “Leba ichwe ogu n'iwe aba Ruhanga waitu, n'iwe tutura tulindiliire kuturokora. Omukama niw'ogu; tutura tumulindiliire; tushemelerwe tushanduke aha rw'okuba yaturokora.”

Ruhanga alibonabonyia Moabu

¹⁰ Omukama alyemera Eibanga lya Sioni, Moabu abe n'iwe alibatilirwa nk'okwo ente zilibatilira ekyaliire.

¹¹ Abamoabu tulimukya emikono nk'atulikugonza kuziha, kyonkai Ruhanga alibafutika bagwe emikono.

¹² Ruhanga alisinjagulikya eboma za Moabu n'oburai bwazo, zisasanuke nk'echuchu.