Isaya 22 - Ebibulia 2001

Ekigambo ahali Yerusalemu

¹ Eki nikyo kigambo ekyabaasirwe aha Ruhanga rw'Okubonekerwa. Inywena mwagendeleraki kutemba aha nshwi z'enju?

² Ekigo kyona nikigambira eiguru, kyayandakarara, nikyeshanda kundi! Abanyu abagwire omu ndashana babaire batalikurashana.

³ Abatwazi banyu bona bairukire babakwata batakarasire mwambi na gumoi. Abanyu mtuli bashangirwe hona bakwetwe. Balikaba babaire bahungiire harai, engaro bazibataireho.

⁴ Nikyo ngiliire nti, “Mundugeho, mundeke nchure muno, mutafa kubi kummaramara aha rw'okuferwa abange omu ndashana.”

⁵ Ekiro kiliho orwo Omukama Ruhanga w'amahe alitwihyamu emikono tukabumbulikwa, bakatulibatilira, tukahiga eky'okukora kikabura, eboma omu Ruhanga rw'okubonekerwa zikakumba, n'omu mabanga abantu bakashekura enduru.

⁶ Aba Elamu bahagatire ebilimba by'emyambi, baina amagali n'ab'efarasi, kandi aba Kiri bashohoza engabo.

⁷ Empanga zawe ezirungi muno, zijwire amagali, n'ab'efarasi betekatekire balebire omuli nyarulembo.

⁸ Amani ga Yuda gona gahwa. Kiro kilinya mukahiga ebikwato by'endashana omu Nju y'Ekibira,

⁹ kugya kubona mushanga ekigo kya Daudi bakitemire ebika bingi. Amaizi g'ekitunga kya bugyaifo mwagataha,

¹⁰ mwabara amaju ga Yerusalemu, mwamara mwagakambura kwihyamu amabare g'okushubisamu eboma kugigumisa.

¹¹ Omugati ya eboma zombili mwalimamu eiziba ly'okubiikamu amaizi ag'ekitunga ekikuru. Kyonkai kandi Ruhanga ayayombekire ekigo ekyo timwamufaho, wenene ogwo ayakitekatekire kwema akarai kona.

¹² Kir'ekyo Omukama Ruhanga w'amahe akaragira abantu kuchura bakakemaramu, kumoisa eishoke n'okwekoma engunia.

¹³ Kandi inywe mwashemelerwa gaba malili. Mwabaaga ente, mwaita entaama, mwalya enyama ezo, n'okunywa mwanywa, mukwese, “Katulye, katunywe, manya nyenkya tuli b'okufa.”

¹⁴ Omukama w'amahe angambiire ati, “Mazima mulilemwa mwafa mutakagaruliirwe ntambara egi.” Nikwo alikuhanga Omukama Ruhanga w'amahe.

Shebuna natatirwa

¹⁵ Omukama Ruhanga w'amahe nagamba ati, “Ogende ow'omusigire olinya, Shebuna, omugelezi wa nyaruju, omugambire oti,

¹⁶ Munu nokoramuki? Hanu aha omwiru wawe n'ohai? Iwe osaine kwebaizira enyanga y'orwazi omw'ibanga?

¹⁷ Nikwo, oli muntu w'enshonga kyonkai Omukama naija kukubaratura ahansi akakujugunya.

¹⁸ Nakubaratura nk'omupira akunage omu nsi eyeyanjaire, obe niyo ogwa n'amagali gawe agakutera eishaija gabe niyo gaikara, iwe orwo wagyaho okahemura nyaruju ya mukama wawe.

¹⁹ Ndakubinga aha mulimo obukuru bukurugeho, obe muntu ataina mugasho.

²⁰ Kir'ekyo ndyeta omwiru wange Eliakimu eya Hilikia,

²¹ enyambarwa eyawe mbe niyo mwambika, omuyondo gwawe mbe nigwo mukoma, n'obushobora obwo obaire oinabwo mbe n'iwe mbuha. Abantu ba Yerusalemu n'ab'enju ya Yuda tulimweta ishebo.

²² Obukama bw'engoma ya Yuda nimbumuha; k'alikingura taliho alikinga, kandi k'alikinga taliho alikingura.

²³ Ndimuteka ahagumire nka mtuli bateka ensindi, obukamabwe buliba ntabuko y'ekitinwa ky'eka ya ishe.

²⁴ Kyonkai abanyabuzare ba wenene bona n'atuli b'okujunwa wenene tulimusikilira, tulimulerembaho okw'obon'ebikwato by'omu nju bilerembire aha mugamba kwema aha kikompe kugoba aha binika mpango.

²⁵ Omukama w'amahe nagamba okwo kir'ekyo ensindi eliba esimbire ahagumire elirugaho, bagiteme egwe, n'obusikizi obulishangwa bugituraho bulihwaho; eki kigambirwe Omukama.”