Isaya 21 - Ebibulia 2001

Okugwa kwa Babiloni

¹ Eki nikyo kigambo ekyabaasirwe aha irungu ly'omwaro gw'enyanja. Nk'okwo akazimu kema omuli Negebu kakagenda nikeya eirungu, nikwo ekibundo kiraruga omu nsi elikutinisa.

² Omu kubonekerwa kwange mboinemu ebiyengo ebibi muno: Omunyagi nanyaga, asilikya nasilikya. Oyeyambe iwe ihe lya Elamu; iwe ihe lya Media obunde ebigo. Enaku zona ezitura zitabuka ahali Babiloni nazimara.

³ Aha rw'ekyo ninchundwa engingo zona, ninshasha muno nk'omukazi alikurumwa; nafa nayosha, n'agabona tinkiinago, enaku zankiza amani n'okuhulira tinkihulira.

⁴ Amagezi tinkiinago, n'obutini nakwatwa obushaguliraine. Ntuura ndindiliire akalembabazana, kyonkai mbwenu enaku zishai nizo nabona.

⁵ Nabona abantu nibatekateka obugenyi, nibara emikeka, nibalya, nibanywa. Aho honkai mpulira eiraka liti, Mwimuke inywe bakuru, musiige engabo zanyu amajuta!

⁶ Omukama angambiire ati, “Ogende oteho omulinzi agambe ebyo arata nabona.

⁷ K'arabona ab'efarasi babili babili, n'abakuubire endogobe n'engamia, ohulilizege, ohulilize n'obwegendeleza bungi muno.”

⁸ Ahanyuma omulinzi agya agira abo yabona, agamba n'eiraka lihango ati, “Waitu Mukama, omushana gwona ninsiiba nyemeleire aha munara obutasimbukaho, n'omu kiro kwakwo.

⁹ Mbwenu nimbona abakuubire efarasi babili babili!” Omukama ahorora omulinzi ati, “Babiloni tekiliho, tekiliho, n'ebihuuku bya baruhanga bamwo byona bikuntukire ahansi byayatayatika.”

¹⁰ Inywe Baisiraeli batahi bange, babashekwire baberura nk'engano, nawe mbwenu nabatona amakuru garungi ago Omukama Rushoborabyona, Ruhanga wa Isiraeli angambiire.

Ekigambo ahali Duma

¹¹ Ekigambo ekyabaasirwe ahali Duma. Omulinzi ati, Haliho alikunyeta ayemire Seiri ati, “Iwe mulinzi, obwire bwabaki, nka butakya?”

¹² Omulinzi agira ati, “Obwire bukya, kyonkai eizoba lishuba litobera. K'oraba nogonza kushuba kumbaza oragaruka ombaze.”

Ekigambo ahali Arabia

¹³ Eki nikyo kigambo ekyabaasirwe ahali Arabia: Inywe bijuru by'Abadedani, murata nimurara omw'ishwa lya Arabia.

¹⁴ Inywe aba Tema abaina eiliho, mubajune mubatwalire amashugi, atulikusingwa mubahe akakulya.

¹⁵ Abantu nibairuka kuhunga aha mbanda eziraliire kubaita, nibasingwa emyambi etabarasha, n'enaku zona z'endashana zitabagwera.

¹⁶ Kuba inye Omukama angambiire ati, “Omwaka guhoileho, omwaka nk'ogw'omupakasi, Kedari erahwaho yona n'ekitinwa kyayo eyebeke.

¹⁷ N'emanzi za Kedari ezirasha emyambi zirakira zike, aha rw'okuba eki kigambirwe Omukama Ruhanga wa Isiraeli.”