Isaya 2 - Ebibulia 2001

Emilembe ey'eirai lyona

¹ Eki nikyo kigambo ekyo Isaya eya Amozi yaboine ekikwete ahali Yuda na Yerusalemu nikigenda kiti:

² Omu biro ebilija, eibanga mtuli enju y'Omukama eli liliba lirailirai kushaga amabanga agandi gona, lilishaga n'enshozi zona, kandi amabanga agandi gona galihurulira eibanga elyo.

³ Abantu bangi tulija, bagambe bati, “Mwije tutembe aha ibanga ly'Omukama, tugye omu nju ya Ruhanga wa Yakobo, atwegese entwazaze, mara tukore ebyo alikwenda.” Kuba eiteka liliruga Sioni, n'ekigambo ky'Omukama kiliruga Yerusalemu.

⁴ Aliramura amahanga, aramure n'abantu bangi. Embanda zabo tuliziheshamu enfuka, n'amachumu gabo tuligaihyamu empabyo. Eihanga tililimukiza linu mbanda, kandi tibalyega ndashana rundi.

⁵ Mwije inywe ab'eka ya Yakobo, tugende orwo Omukama yatushamulira.

Ab'eikuru tulisilika

⁶ Waitu Ruhanga oyangire abantu bawe eihanga lya Isiraeli. Nobatura okugira abafumu bangi b'oburugaizoba, baina abateeki b'enshoga nk'Abafilisiti, kandi nibashemelerwa emichwo y'abanyamahanga.

⁷ Ensi yabo eijwire efeza n'ezahabu, eitunga lyabo tilyakugambwa, ensi yabo eijwire efarasi n'amagali tigaina rubara.

⁸ Ensi yabo eijwire ebihuuku, nibabandamira ebyo bonene bekoleire.

⁹ Kityo omuntu yatohiibwe, abantu tibakina iraigi, otabaganyira!

¹⁰ Otahe omu rwazi, oyesheleke omw'itaka, oiruke Omukama anigaire, ohunge aha Mukama w'amani n'ekitinwa.

¹¹ Omuntu ow'eisinini aliterwa ahansi, n'abantu b'ekyeju tulitohibwa, kir'ekyo Omukama wenkai n'iwe alihaisilizibwa.

¹² Kuba Omukama w'amahe aina ekiro ekyo aliramuliraho ab'eikuru n'eisinini, na bona abekuza bakesingiza.

¹³ Aliramura emielezi yona ya Lebanoni ey'eikuru n'eisinini, aramure n'emialoni yona ya Bashani.

¹⁴ Aliramura amabanga gona agaraigarai n'enshozi zona eziraizirai.

¹⁵ Aliramura buli munara oguraigurai na buli boma egumire.

¹⁶ Aliramura emeli zona eza Tarishishi, n'ebintu byona ebirungi ebikorano.

¹⁷ Omuntu ow'eikuru aliterwa aha mutwe, eijegu ly'abantu lilifutikwa. Kir'ekyo Omukama wenkai n'iwe alihaisilizibwa.

¹⁸ Ebihuuku bilihwaho limoilimoi.

¹⁹ Abantu tulitaha omu mpako z'amabare n'omu binyanga, babone kwiruka Omukama anigaire, bahunge aha Mukama w'amani n'ekitinwa, orwo alimuka kujugumbisa ensi.

²⁰ Kir'ekyo abantu tulijugunya ebihuuku byabo by'efeza n'ebihuuku byabo by'ezahabu, ebyo bakozire kuta nibabifukamira, babijugunyire enfukuzi n'empugahugu.

²¹ Balitaha omu mpako z'amabare n'omu bihokoima, kwiruka Omukama anigaire, kuhunga aha Mukama w'amani n'ekitinwa, orwo alimuka kujugumbisa ensi.

²² Omuntu nyabuntu otamwesiga, isi agira mugashoki?