Isaya 19 - Ebibulia 2001

Ekibonabonyio kya Misiri

¹ Eki nikyo kigambo ekyagambirwe ahali Misiri. Leba Omukama ali aha kichwi kiirukire muno, naija Misiri. Ebihuuku bya Misiri kabiramubona nibijugumba; Abamisiri bahwe omwoyo.

² Omukama nagamba ati, Ndatejanyia Abamisiri emitwe, omuntu aterangane n'omurumuna, omuntu na munywanyiwe, omuntu na mwatan'iwe, engoma erashane n'engoma endijo.

³ Ebyo Abamisiri tulikutegeka ndabitabura, nshube mbamare ekihika. Bararaguza aha bihuuku n'abarogi n'abafumu n'atulikugambisa ebizimu by'abafu.

⁴ Kyonkai Abamisiri abo ndabaanaga omu mikono y'omutwazi alikugwa kubi, batwarwe omukama omukutu, nikwo Omukama, Omukama w'amahe alikugamba.

⁵ Omwiga gwa Naili gurayomera kimoi, gwome gelegere.

⁶ Enyato za Naili zinuke chuchuchu, n'emikono ya Naili omuli Misiri eyomeere eshube eyomeere kimoi. Ebifunjo n'ebibimbili nibija kujunda.

⁷ Ebikunguru bya Naili biraba nkuute, na byona ebyo barabiba ahali Naili byome, bihutwe omuyaga, tibilizoka rundi.

⁸ Abajubi barachura bayaige, bona abajubisa amarobo omuli Naili. Abajubisa amashambo omu mwiga ogwo barashasha muno agakaba.

⁹ Abakozi b'emyendo ya kitani barananukwa, n'abaruki b'emyendo y'epamba n'ababuya nibaija kuhendeka emitima bakashasha muno.

¹⁰ Abatwazi b'ensi barafa boshe, n'abapakasi bona obujune bubaite.

¹¹ Abatwazi ba Zoani bafera bwoli, n'abategekera Farao ab'amagezi nibamutegekera eby'obufano. Ogambire otai Farao oti, “Inye mba mwana w'omunyamagezi, nintambuuka omu bakama aba karai?”

¹² Mbwenu ab'amagezi bawe bandage! Nibakugambire bakumanyise ekyo Omukama w'amahe araliire kukora Misiri!

¹³ Abatwazi ba Zoani babaire bafera, n'aba Memfisi babeiyabeihirwe. Abakuru b'enganda za Misiri nibo bahabisize ensi egyo.

¹⁴ Omukama atabwire Misiri. Ekirugire omwo Misiri eby'elikukora byona nekora ebitalikwo. Abamisiri nibataratara nk'omutamiire alikutelera omu ntanakiye.

¹⁵ Omu nsi yona talimu mutungi anga munaku, mushongore anga kacheku ow'okushobora kujuna mutahiwe.

Misiri elifukamira Omukama

¹⁶ Obukiro bulija orwo Abamisiri tulishusha abakazi. Balichundwa orubimbili orwo tulibona Omukama w'amahe aimukize omukono kubabonabonyia.

¹⁷ Ensi ya Misiri elitina muno ensi ya Yuda. Buli omoi omuli Misiri alihulira eky'Omukama araliire kubakora, alitina.

¹⁸ Omu makiro ago ebigo bitanu omuli Misiri biligamba orulimi rwa Kanaani, kandi tulinahira nibajuliza Omukama w'amahe. Kimoiho omu bigo ebi tulikyeta Kigo ky'Eizoba.

¹⁹ Orwo obukiro buligoba balyombekera Omukama alutare omuli Misiri, bamwombekere n'enyomyo y'amabare aha rubibi rw'ensi egyo.

²⁰ Altare egyo n'enyomyo egyo biliba bubonero okwo Omukama w'amahe aliba asingiire omuli Misiri. K'Abamisiri tuligira abantu ab'okubabonesa enaku, orwo tulitakira Omukama alibatwekera omurokozi, alibarwanilira mara abarokore.

²¹ Omu makiro galinya Omukama aliha Abamisiri okumumanya, nabo tulimumanya, bamufukamire nibamutambira ebitambo n'ebihongo by'okwokibwa. Baligira n'ebyo bamuraganisa babigobesheleze.

²² Wenene Omukama alitera Abamisiri, abatere nabakiza, bamugarukeho, alihulira okutaka kwabo mara abakize.

²³ Omu makiro ago halibaho nyaihanda elikuruga Misiri kugya Asiria. Abaasiria baragyaga Misiri, n'Abamisiri baragyaga Asiria, kandi Abamisiri balyema hamoi n'Abaasiria kufukamira Ruhanga omoi.

²⁴ Omu biro ebyo Isiraeli elyelenga ahali Misiri na Asiria, kandi amahanga aga gonshatu ensi yona galigibera mugisha.

²⁵ Amahanga aga gonshatu Omukama w'amahe aligaha omugisha nagamba ati, “Eihanga lyange lya Misiri lihabwe omugisha, Asiria eyo nayetondeire, na Isiraeli eihanga elyange nyabwange.”