Isaya 16 - Ebibulia 2001

Enaku za Moabu

¹ Abamoabu kwema Sela ekigo ky'omw'irungu kugoba Sioni bakatwekera omutwazi w'ensi obwana bw'entaama.

² Okw'obona ebinyonyi bili eiguru bitalikuharara, bibingirwe omu bishunkuli, nikwo Abamoabu tuli omu kyambu kya Arinoni.

³ Baliho bakwese, “Otutegekere, oturamure eiramu ly'amazima. Omw'ihangwe otubere kibeho tushushe atuli omu kiro, osheleke abashendwa, kandi alikuhunga otamugamba.

⁴ Abashendwa ba Moabu obaleke baikare omu nsi yawe, obahungye aha mubisha atabasilikya. Orwo ogwo abonesa banu enaku aliba yafire, atakiita bantu, wenene ogu ajungilira banu omw'itaka k'aliba yahoire omu nsi;

⁵ Ruhanga ow'ekisha alitaho enketo, kandi omw'ihema lya Daudi halirugwamu omwesigwa, aijwire obugorogoki, kandi alikwitanira amazima n'okuramura eiramu elyemeleire aikaliire enketo egyo.”

⁶ Twahuliire okwo Moabu agira eikuru, eituli, eisinini, n'eitulikizi; kyonkai amalingoge ga busha.

⁷ Aha rw'ekyo Moabu achure, mara buli omoi achulire Moabu. Nimwija kuterwa muno, muchure aha rw'okuba emikate y'ezabibu eya Kirihareseti timukigibona.

⁸ Endimiro za Heshiboni zomire, n'omuzabibu gwa Sibuma gwahotoka. Abakama b'amahanga bagutemire amatagi agagoba Yazeri, gakakanga n'omw'irungu, n'amatagi gagwo agandi gagobaga omu mahanga orwo yashabukaga enyanja.

⁹ Nikyo ndikulilira omuzabibu gwa Sibuma nk'okwo aba Yazeri tulikugulilira. Ninchulira Heshiboni na Eleale, kuba timukina igesha ely'okuha abantu ebyera.

¹⁰ Endimiro eyayezaga mbwenu tekileta byera na mashemelerwa. Omu ndimiro z'emizabibu tihakizinirwamu bizina, empundwi tizikihulirwamu. Takiliho muntu wa kujunga divai mu bwato; nibajunga tibakishemelerwa.

¹¹ Kityo Moabu ningichulira okw'obona enanga, na Kiriheresi nenganyia.

¹² N'orwo Abamoabu tulikugya omu buju bwabo omu mabanga kushoma enshara, nibelemesa bushai, tibaina kyobaragasirwa.

¹³ Ekigambo eki obwa karai Omukama akakigamba ahali Moabu.

¹⁴ Kyonkai mbwenu Omukama nagamba ati, “Omu myaka eshatu, emyaka nk'ey'omupakasi, Moabu n'orwo tuli bangi batai, eitunga liragihwaho, kandi Abamoabu abarahonokaho bake, mara tibagiire mani.”