Isaya 15 - Ebibulia 2001

Omukama alisilikya Moabu

¹ Eki nikyo kigambo ekyagambirwe ahali Moabu: Moabu echechekire aha rw'okuba ekigo kya Ari bakisilikize omu kiro. Telikujega kuba na Kiri bagisilikize omw'itumbi.

² Abantu ba Diboni batembire aha ibanga eiguru kuchura. Abamoabu nibaborogera Nebo na Medeba eiguru. Buli omoi amoisize eishoke n'ebileju.

³ Nibaraba omu kigo bajwete engunia; buli muntu nachura eyobobo, naboroga aha rushwi rw'enju n'aha mihanda etana.

⁴ Aba Heshiboni na Eleale nibachura, amaraka gabo nigagoba Yahazi; nikyo eihe lya Moabu lilikuchulira, buli omoi najugumba.

⁵ Ndiyo ninchulira Moabu. Abantu bawe nibahungira Soari na Egilatishelishiya. Nibatemba akabanga ka Luhiti nibachura; nibachura bagiire Horonaimu aha rw'ensi yabo kusilika.

⁶ Akaiga ka Nimurimu komeire, obunyasi bwayoma, kandi taliho bulikumera, buli kantu komire.

⁷ Nikyo tulikusingisiza ebyabo nibabishaabura Akaiga k'Emikinga.

⁸ Enduru zamaraho ensi yona ya Moabu, zagoba Egilaimu na Berielimu.

⁹ Omwiga gwa Diboni gwijwire obwamba, mara Diboni yonene ninyija kugyongera amashasi, niyo ntare elikwija kulya Abamoabu atulikwiruka kuhunga, n'abasigaire omu nsi egyo.