Isaya 14 - Ebibulia 2001

Okuruga omu buzahe kwa Isiraeli

¹ Omukama aligilira Yakobo embabazi, ashube aronke Isiraeli. Alibagarura omu nsi yabo n'abanyamahanga balyetaba nabo, nabo babe b'eka ya Yakobo.

² Amahanga galijuna Abaisiraeli kugaruka owabo, mara eka ya Isiraeli elitwara amahanga ago, babe bairu babo, bazana babo abababonesaga enaku.

Omukama wa Babiloni omu bafu

³ Orwo Omukama aliba yabaihire omu naku ezo zona ezo muliba mutwiremu,

⁴ mutere omukama wa Babiloni omwizo muti, “Ayatubonesaga enaku takiliho, ayatugizaga omwaga yahoireho n'eikurulye.

⁵ Omukama ahenzire enkoni y'abantu babi, enkoni y'abakama;

⁶ eyateraga abantu hati hati nebaisa omwaga, eyatwaraga amahanga negabuyanisa, nebagingiza obutalekera.

⁷ Ensi yona etulijainyie, yachulera, abantu nibahoya, nibashemelerwa.

⁸ Emiberoshi n'emielezi ya Lebanoni neshanduka, nekukoleza iwe mukama wa Babiloni eti, ‘Orwo amani bagakumazire, ow'okutusindura takiliho.’

⁹ Sheoli okuzimu neyebarabata, kukwakilira orwo oragenda, abazimu bamwo nibelya kukutangilira, nibo tulinya bona ababaga batwazi omu nsi. Bona ababaga bakama ab'amahanga, nibaruga aha nketo kukunyegeza.

¹⁰ Bona nibaija kukugambira bati, ‘Naiwe amani gakuhwa nka ichwe! Waba nka ichwe!’

¹¹ Eikuru lyawe Omukama yalinaga Sheoli, n'enanga zawe ezo bakuteleraga. Ekitanda kyawe nzito, ebihuka nibyo oyeshwekire.

¹² Iwe Nyanyinyi Kyabashumba, Bwire bw'Emambya, watongoka aha iguru! Iwe ayaburabuzaga amahanga, bakutema wakuntuka ahansi.

¹³ Watekelezaga oti, ‘Ninyija kutemba omw'iguru, enketo yange ngiteke eiguru y'enyanyinyi za Ruhanga. Nshuntame kulinya bikara, aha ibanga mtuli baruhanga bateranira;

¹⁴ ntembe ndabe omu bichwi, nshushe Rukirabyona.’

¹⁵ Mbwenu Omukama yakunaga Sheoli, omu kina owa dondondo.

¹⁶ Abarakubona barakushoberwa, bakugambeho bati, ‘Ogu n'iwe muntu ayajugumbisaga ensi yona, akatengesa engoma z'abakama?

¹⁷ Niwe yaisire ensi ekaba irungu, akasilikya ebigo byamwo, atataishuraga mbohe?’

¹⁸ Abakama b'amahanga baziikwa omu kitinwa, buli omoi aziikwa omu nyanga eye.

¹⁹ Kyonkai iwe waba mushendwa, twaziikwa omu nyanga yawe, washusha enda erugamu ejunzire, obunzirwe abo baisire, abachumisirwe embanda, abo baanagire omu kina ky'orwazi, oli nk'omuntu owo bajungilire omw'itaka.

²⁰ Abo tolizikwa nabo, kuba ensi yawe okagiita omwebura, abantu bawe wabaita. Baijukuru b'abafakare bataligambwa rundi!

²¹ Mutekateke ah'okwitira abaanabe, bazire entambara za baish'enkurubo, bataija bakagira mani bakatwara ensi, bakagijuza ebigo.”

Ruhanga alisilikya Babiloni

²² Omukama w'amahe nagamba okwo alisilikya eihanga lya Babiloni, titulimanyika, kandi taliho aliruhonokaho, amareho abaijukuru n'ebizimbire.

²³ Wenene Omukama w'amahe nagamba okwo Babiloni egyo aligihindura buturo bw'ebishegeshe mara ebe bitunga by'amaizi; agimazeho ebibundo.

Omukama alisilikya Abasiria

²⁴ Omukama w'amahe arahiire ati, “Okwo ntegekire nikwo biliba; kandi okwo ngendeleire nikwo biliba.

²⁵ Ndilibatilira Omuasiria ali omu nsi yange, mujungilire aha mabanga gange, nirwo alilekera kubonesa abantu bange enaku, alekere kubashasa.

²⁶ Egi niyo nama egendeleirwe ensi yona, n'omukono nagwimukize kubonabonyia amahanga gona.”

²⁷ N'ohai ayakutanga Omukama w'amahe kukora ekyo agendeleire? N'ohai aramufunya omukono yagwimukize?

Ruhanga alisilikya Abafilisiti

²⁸ Eki nikyo kigambo ekyagambirwe omu mwaka ogwo Omukama Ahazi yatahiizemu:

²⁹ “Inywe Bafilisiti inywena mutashemelerwa, kubona enkoni ebateire ehendekire. Kuba omu ruzaro rw'enjoka nihaija kurugwamu empiri, kandi empiri egyo elizara engambira.

³⁰ Abaanaku tulizigaija abaana, abaana abo balye baigute, n'aboro babyame batalikweligomwa kantu. Kyonkai iwe baijukuru bawe ndibaisa eifa, kandi baijukuru bawe atulihonoka aha ifa ndibakindura.

³¹ Iwe nyarulembo iwe, oboroge! Na iwe kigo ochure! Bafilisiti inywena, muhahanwe emitima, kuba omwika gwaletwa bikara, mara elyo ihe elitainamu butini.”

³² Entumwa z'Abafilisiti omuntu azihorore atai? Turabagira tuti, “Omukama n'iwe yahangwire Sioni. Kandi omuli Sioni omwo nimwo abantube atulikwitwa kubi tulihungira.”