Isaya 13 - Ebibulia 2001

Ruhanga alibonabonyia Babiloni

¹ Ekigambo ekyo Isaya eya Amozi yaboine ahali Babiloni.

² Simba ebendera y'endashana aha katwetwe k'eibanga enkuute, mwete abaisherukare n'eiraka lihango. Mubatigise, batahe omu bigo by'enganda z'abakama.

³ Inye ndagire endonkwa zange, nayeta emanzi zange ezigenda nizebuga kugya kundashanira n'okubonabonyia abo nigaliire.

⁴ Muhulire! Amabanga nigomba okw'obona embaga y'abantu etali nke. Muhulire akahiliro, engoma ziteraine! Omukama w'amahe nahumbanisa eihe ly'okurwana endashana.

⁵ Abaisherukare abo nibaruga harai muno, baina Omukama, baizire kusilikya ensi yona.

⁶ Muchure, kuba ekiro kyagoba Omukama kubaramura. Kiro kyonene ekyo nirwo Rushoborabyona alikwija kusilikya ensi yona!

⁷ Aha rw'ekyo abantu bona nibaija kuchundwa emikono, buli omoi atine, abantu bona bahahanwe.

⁸ Baratina muno, n'obushasi bubakwate bungi; bashage nk'omukazi alikurumwa. Amaisho gabatukure, balebangane obutini bubemire kubi.

⁹ Leba, ekiro ky'eiramu ly'Omukama kyagoba, tikina buganyizi shana ekiniga n'akanihi. Kiro ky'okusilikya abafakare omu nsi, ekasigara ndaara.

¹⁰ Enyanyinyi aha iguru, nangu na kakaga, tizilikwija kwaka, eizoba lirashabuka niliragura, n'okwezi tikuyake.

¹¹ Ensi ndagibonabonyia ningitura amafu gayo, ababi mbature entambara zabo. Ab'eikuru ndibachwe, kandi abakatili ab'eisinini mbafutike.

¹² Abashaija barazoka bake kushaga ezahabu enchenkure, abantu bazoke bake kushaga ezahabu ya Ofiri.

¹³ Aha rw'ekyo eiguru ninyija kulitengeesa n'ensi yona egire omusisi. Kir'ekyo Omukama w'amahe aratamwa anigare muno.

¹⁴ Abantu barashusha enshama elikuhigwa abahigi anga babe nk'entaama zitaina mushumba. Buli omoi aragaruka omu ba wenene, buli muntu asingiirwe owabo.

¹⁵ Buli muntu owo barakwata nibamuchumita, ow'engaro ziragwaho naitwa embanda.

¹⁶ Enkelemeke zabo bazibachwagulikize omu maisho, amaju gabo baganyage, kandi abakazi babo babahambe.

¹⁷ Ninyija kusindika Abamedi babatatulire, abatafaho feza anga kugonza zahabu.

¹⁸ Emyambi yabo eraita abasigazi, kandi taliho muntu owo baraganyira, kandi tibaganyire baana.

¹⁹ Babiloni ekitinwa ky'engoma, ekirungo mara ekyebugo ky'Abakalidayo, elisilika nka Sodoma na Gomora orwo Ruhanga yabisosotoire.

²⁰ Babiloni abantu tituligituramu rundi, nangu n'amakiro gona teliturwa. Taliho Mwarabu alisimbamu ihema, n'abashumba titulilisizamu mahyo gabo ga ntaama.

²¹ Ebikaaka nibyo bilitura omwo, n'amaju gayo galiturwamu ensindizi zingi. Enyonjo ziture omu kigo ekyo, n'ebinyamugenge bizinire omwo.

²² Empumi zilihuumira omu minara ya Babiloni, emiha ekungire omu minara y'amaju g'omulembe. Ebiro byayo byafunda, amakiro gayo gahwaho.