Isaya 10 - Ebibulia 2001

¹ Zabalya abataho emiku etagorogokire, n'abahandiki abahandika eby'okushasa banu.

² Omugendelero gwabo kulyangishanyia ehaki z'abajege, kandi kwaka abaanaku bange ehaki zabo. Nibagonza okunyaga entumbwakazikazi, n'okushasa entabwa.

³ Muligira mutai aha kiro ky'eiramu? Mulikoraki orwo omubisha aliruga harai akabasilikya? N'ohai owo mulikuhungiraho k'abaha emikono? Isi eitunga lyanyu mulilisigira ohai?

⁴ Muraba mutakiina kindi eky'okukora, shana okwajura omu mbohe, anga kukumba omu baisirwe. Ebyo byona bibe bityo, wenene takalekeire kubanigalira, n'omukono akyagwimukize kubabonabonyia.

Omukama wa Asiria kibonabonyio kya Ruhanga

⁵ Asiria, enkoni eyo nigara nkakwata! Asiria, omuguma ogwo ntamwa nkaimukya!

⁶ Asiria n'iwe nsindikira eihanga elitetaho Ruhanga, n'iwe ndagira kutatulira abantu abo nanigalira kugya kubanyaga n'okubajungilira nk'eshabo y'omu kigo.

⁷ Kyonkai omukama wa Asiria tikwo alikugendelera, n'okutekeleza tikwo alikutekeleza. Wenene natekeleza okusilikya amahanga gangi akagaita;

⁸ aha rw'okuba nagira ati, “Abakuru b'amahe gange bona ti bakama?

⁹ Isi Kalino telikwigana Kakemishi? Hamasi telikwigana Arupadi? Isi Samaria telikwigana Damasiko?

¹⁰ Nk'okwo omu bushobora bwange nabonabonyize engoma ezagiraga ebihuuku, ezagiraga ebishushani by'amabare ebibaijano ebyakiraga ebya Yerusalemu na Samaria,

¹¹ timbonabonyie Yerusalemu na bihuuku byayo nk'okwo nakozire Samaria n'ebishushani byayo?”

¹² Orwo Omukama aramara kukora ebyo alikwenda byona aha Ibanga lya Sioni n'omuli Yerusalemu, naija kubonabonyia Omukama wa Asiria namutura eikurulye n'amalyoge n'okweshalingyakwe,

¹³ kuba wenene omukama wa Asiria nagamba ati, “Ebi nkabikoza obushobora bwange, n'obumanyi bwange nyina amagezi. Amahanga ngateranisize, n'eitunga lyago nalinyaga; nashusha enumi, ababaire bali aha nketo nabaihyaho.

¹⁴ Eitunga ly'amahanga nkashusha ayalishanga omu kishunkuli, ensi nagiteranisa okwo abantu bashoroza amahuli g'enyonyi enagireho. Taliho ihanga na limoi elyatengize ipapa, anga kwashamya kanwa kundurumira.”

¹⁵ Endyamiti yakulingira omuntu alikugitemesa, anga omushumeno gulingire omuntu alikugushaza? Ekyo kyakubaire nk'okwo enkoni yakushutwire agikwete, anga omuguma kwimukya omuntu atali kiti!

¹⁶ Aha rw'ekyo Omukama, Omukama w'amahe, arabasindikira endwara abatebese, kandi omu bushoborabwe, abasindikire orubabiliro nk'orw'omuliro.

¹⁷ Omushana gwa Isiraeli guliba muliro, n'Omutakatifu wa Isiraeli abe rulimi rw'omuliro; orulimi orwo rw'omuliro rwokye rumareho amahwage n'orukwantangorwe omu mushana gumoi.

¹⁸ Kandi Omukama naija kumaraho ekitinwa ky'ekibirakye, n'ensiye elikweza muno, asilikye omwoyo n'omubili, abe nk'omuntu arwaire okwo ahwa aha magufa.

¹⁹ Omu kibirakye harasigarwamu emiti mike, nangu n'omwana yakugibara.

Abake nibo tuligaruka

²⁰ Kir'ekyo Abaisiraeli atuliba basigaireho, n'ab'enju ya Yakobo atuliba bahonokireho ayabateire tuliba batakimwegamira, shana Omutakatifu wa Isiraeli n'iwe balyegamira omu mazima.

²¹ Aba Yakobo atuliba bahonokireho tuligarukira Ruhanga Omushobora.

²² N'orwo abantu bawe Abaisiraeli tuliba nibaigana omushenye gw'enyanja, atulihonokaho bakagaruka tuliba bake. Okusilikya kukaragirwa: Kyonkai okusilikya okwo kulirugwamu obugorogoki bungi muno.

²³ Omukama, Omukama w'amahe alibamaraho omu nsi yona nk'okwo kyaragiirwe.

Ekibonabonyio kya Asiria

²⁴ Aha rw'ekyo Omukama, Omukama w'amahe nagamba ati, “Inywe bantu bange Sioni, Abasiria mutabatina orwo barabatera bakababonesa n'enaku nk'okwo Abamisiri bagizire.

²⁵ Omu kanya kake inywe ndalekera kubanigalira, kandi nigaliire bonene mbasilikye.

²⁶ Omukama w'amahe naija kubashatura nk'okwo yashatwire Abamidiani aha rwazi rwa Orebu. Araimukya enkoniye agyolekeze omu nyanja, abonabonyie Abamidiani abo nk'okwo yabonabonyize Abamisiri.

²⁷ Kiro kyonene ekyo Omukama omugugu ogwo yabataire aha mabega aligubaihyaho, abaihye n'enkomo eyo yabataire omu bikya agihendahende.”

Etabaro y'omubisha

²⁸ Omubisha naija kuruga Rimoni, agobe Aihati, aletwe Migironi, ebikwatobye abibiike Mikimashi.

²⁹ Barashabuka ekyambu nibairukairuka, barare Gibea; aba Rama bachundwe, kandi Gibea eya Sauli basingwe.

³⁰ Muchure, inywe aba Galimu! Hulira inywe aba Laisha! Kandi inywe aba Anatoti mumuhorore.

³¹ Madimena nesingwa, kandi aba Gedimu nibairuka kuhunga.

³² Kir'eki omubisha naija kwemelera Nobu, akoleeze Eibanga lya Sioni, orushozi rwa Yerusalemu.

³³ Omukama, Omukama w'amahe naija kutema amatagi n'obushobora obulikutinisa muno, abaraibarai muno abateme, abagufaze.

³⁴ Ekibira ekishokeraine akitemese embaizi, Lebanoni egwe n'emiti yayo emirungi.