Isaya 1 - Ebibulia 2001

¹ Ebi nibyo Isaya mutabani wa Amozi yabonekeirwe ahali Yuda na Yerusalemu, omu makiro ga Uzia, Yotamu, Ahazi na Hezekia abakama ba Yuda.

Ekibonabonyio kya Yuda

² Hulira iwe iguru, tega amatwi iwe nsi, aha rw'okuba Omukama agambire ati, “Abaana nkabalera kyonkai banshenga.

³ Ente emanya mukama wayo, n'endogobe nemanya akaato mtuli mukama wayo agilisizamu. Kyonkai Isiraeli talikumanya; abantu bange titulikushobokerwa.”

⁴ Wagwerwa iwe ihanga nyamafu, abantu abafakare muno, inywe muzarwa gubi, inywe baana abagoke! Musigireho Omukama, mwagaya Omutakatifu wa Isiraeli, mwashenga limoilimoi.

⁵ Kubaki nimuzigilira okwikara nimubonabonyibwa nimuzira okwikara muli bashengi? Omutwe gwona gwijwire embare, n'omutima gujunaire gwona!

⁶ Kwema aha mutwe kugoba aha kalenge timwina mtuli mutahutaire. Musonokire, muronzire, engoga nizijwa obwamba; mara tizogire, tizikomire handiki kugibwaho majuta.

⁷ Ensi yanyu ebaire ndaara. Ebigo byanyu byahya; abanyamahanga nibalya ensi yanyu mulebire; mara yonene ndaara okw'obon'oti esilikibwe abanyamahanga.

⁸ Sioni niyo esigaireho nk'akakondeka omu ndimiro y'emyongo, eli nk'okwo obona ekigo kibunzirwe.

⁹ K'Omukama w'amahe atakugizire boyatuhonoleraho twakubaire nka Sodoma na Gomora.

Obugobya bwa Isiraeli

¹⁰ Inywe batwazi ba Sodoma, hulira ekigambo ky'Omukama! Inywe bantu ba Gomora muhulire ebyo Ruhanga waitu alikubegesa!

¹¹ Omukama nagamba ati, “Obungi bw'ebitambo byanyu inye bunkwatiireki? Ebitambo byanyu by'entaama eby'okwokibwa n'ebishaju by'eshajwa nabiigusire. Bwaba bwamba bwa nte anga bwana bwa ntaama anga bwa mbuzi tindikubushemelerwa.”

¹² “Orwo mulikwija omu maisho gange alikubenza egabo ezi n'ohai? Manya nimuhigiraho obushango bw'okulibatilira nyakabuga zange.

¹³ Mutagendelera kundetera gabo zanyu eza katozi. N'obunuma ahali inye muziro. Amagenyi ganyu aha kwezi kwemire n'ahali Sabato n'okuhuruza enteko tindikubyenda n'akake. Amafu ganyu n'enteko zanyu tinakubyemera.

¹⁴ Amagenyi ganyu aha kwezi kwemire n'aha biro bikuru byanyu nimbitamwa muno. Byanyizire, tinkibyemera.

¹⁵ Kamurantega emikono timbalebe, n'orwo murashoma muno enshara timbahulilize, ahakuba mwisire muno abantu.

¹⁶ Mwoge mwere mulekere kunfakalira.

¹⁷ Mwege okuta nimukora kurungi, mwitanire amazima, mulekere kushasa banu, murwanilire enfuuzi n'entumbwakazikazi.”

¹⁸ Omukama nagamba ati, “Mwije tumare ebigambo. N'orwo muraba nimutukura tukutuku aha rw'amafu ganyu murayera nk'epamba.

¹⁹ Kamurakunda mukagira omuhuliro muralya akashaju k'ensi.

²⁰ Kyonkai kamurayanga mukashenga muraitwa embanda aha rw'okuba eki kyaruga omu kanwa k'Omukama.”

Ekigo ky'abafakare

²¹ Kihindukire kitai kimalaya, ekigo ekyesigwa, ekyagiraga amazima! Kyabaga kigorogoki kyonkai mbwenu abantu bamwo baisi b'abantu!

²² Efeza yawe ebaire jagata, edivai yawe yajubuka.

²³ Abatwazi bawe bashengi, kandi batahi b'abashuma. Buli muntu nagonza rushwa, nahigiliza kugira ako bamuha. Tibakirwanilira nfuuzi n'entumbwakazikazi tizikibatoijaho.

²⁴ Aha rw'ekyo Omukama, Omukama w'amahe, Omushobora wa Isiraeli nagamba ati, “Ababisha bange ninyija kubamaliraho ekiniga, abannoba mbehoroze.”

²⁵ “Kanyije nkubonabonyie, nkujugute nk'ekyoma nkumareho ejagata.

²⁶ Ngarureho abaramuzi nk'obunyakarai, n'abategeki nk'obubere. Ahanyuma orayetwa kigo ekigorogoki, kigo ekyesigwa.”

²⁷ Sioni erachungurwa amazima, na tulinya atuli omu kigo ekyo atulikwechuza, barachungurwa obugorogoki.

²⁸ Kyonkai abashengi n'abafakare nibasilikijanyibwa, na tulinya atulikwebwa Omukama nibafa.

²⁹ Nimwija kushonara aha rw'emiti y'emialoni eyo mwashemelerwaga, mushonare aha rw'endimiro ezo mwaihireho.

³⁰ Murashusha omwaloni ogwoma amababi, mube nk'endimiro etaina maizi.

³¹ Ow'amani arashusha ekishagate, n'ebikorwabye bibe nk'enshasi z'omuliro. Enshasi z'omuliro zikwatangane n'ekishagate, kandi taliho araraza muliro ogwo.