Hosea 9 - Ebibulia 2001

Hosea naranga ekibonabonyio kya Isiraeli

¹ Iwe Isiraeli, leka kushemelerwa! Leka kwesiima nk'amahanga agandi, aha rw'okuba okatera obumalaya, wasigaho Ruhanga wawe. Wagonza kuba malaya, okahongwa aha byano byona ebyo bateleraho emyaka.

² Kyonkai ebyano n'amajungiro g'edivai tibilibatunga, n'edivai mpya tibaligibona.

³ Ensi y'Omukama tibaligiikaramu kyonkai Abaefuraimu baligaruka Misiri; n'omuli Asiria balilyamu ebyakulya bihagaire.

⁴ Omu mahanga ago tibalibonamu divai ya kuhongera Mukama, tibalitamba na bitambo bikamushemelera. Ekyakulya kyabo kilishusha eky'abali omu rufu, abalikilya bona balihagara. Balilya kutamba enjara kushai, ekyakulya kyabo tibalikitwara Rwensinga y'Omukama.

⁵ Muligira mutai aha kiro ky'ekyosi, aha kiro kikuru ky'okusingiza Omukama?

⁶ Kuba nimugya Asiria; Misiri ebashombokye hamoi, Memfisi ebaziike. Ebintu byanyu by'efeza eby'eiguzi bilibundwa engenyi, amaju ganyu gamerwemu emiti y'amahwa.

⁷ Ebiro by'ekibonabonyio byagoba, obukiro bwakyo buhikire. Omurangi mufera, n'ow'omuchwezi gubanzire ararukire, aha rw'entambara zanyu zingi n'enobi yanyu etali nke ahali inye.

⁸ Omurangi niwe mulinzi wa Efuraimu, abantu ba Ruhanga wange. Kyonkai hona mbali alikugya nibamutega omutego ogw'omutegi w'ebinyonyi. Kandi omu nsi y'Omukama nibanoba omurangiwe.

⁹ Babaire babi bashagulirana nk'omu makiro ga Gibea. Entambara zabo Omukama alizijuka, ababonabonyie nabatura amafu gabo.

Amafu ga Isiraeli n'akabi kago

¹⁰ Omukama nagamba ati, “Isiraeli nkamushanga nashusha ezabibu z'omw'irungu. Bashwenkurw'inywe kanabaaboine bakaba nibashusha ebiraba by'omutini gulikuzigaija omu mwaka gwagwo gw'okubanza. Kyonkai kabagobire Baalipeori bayehongera Baali, bahinduka kinyamunuge nka baruhanga abo bagondize.

¹¹ Ekitinwa kya Efuraimu kilitunta nk'enyonyi. Taliho alizara mwana, n'okutwara enda chei, n'okugibaka chei.

¹² N'orwo balilera abana babo ndibaita obutasigaraho n'omoi. Balikagwamu kandibasigaho.

¹³ Okwo naboine, abana ba Efuraimu balitwarwa endore, kandi Efuraimu niwe alyebembera abaanabe abo kugya kwitwa.”

¹⁴ Obagire otai waitu Mukama! Obanagise enda, obomese amabere.

Eiramu ly'Omukama ahali Isiraeli

¹⁵ Omukama nagamba ati, “Amafu gabo gona gakamanyikira Giligali, niho nabandize kubatamwa. Aha rw'ebigiro byabo bibi ndibabinga omu nsi yange. Tindibagonza rundi, enshonga abatwazi babo nibanshenga.

¹⁶ Abaefuraimu bateirwe, nibashusha omuti ogwomire emizi ogutashobora kuraba. N'orwo balizara abana, abana babo abagonzibwa ndibaita.”

Omurangi nagamba ahali Isiraeli

¹⁷ Ruhanga wange abantube alibanga. Aha rw'okuba tibamuhulire, balyenjera omu mahanga.