Hosea 8 - Ebibulia 2001

Omukama alibonabonyia Abaisiraeli

¹ Omukama nagamba ati, “Mute enzamba aha munwa, kuba eihungu nilyeleera aha nju yange eiguru, kuba Abaisiraeli bachwire endagano yange, bashaga Amateka gange.

² Nibantakira nibagira bati, ‘Ruhanga waitu, ichwe Abaisiraeli nitukumanya.’

³ Ebirungi babyangire, mbwenu omubisha arabahondeleza.”

⁴ “Bakataho abakama ntabaragiire, baronda abatwazi ntalikumanya. Bakahesha n'ebihuuku by'efeza n'ezahabu kweisa.

⁵ Iwe Samaria, enyana yawe ngyangire, mara nkutamirwe muno. Balilekera maki kufukamira ebihuuku?

⁶ Enyana egyo ya Samaria ti Ruhanga. Ekaheshwa omuhesi, mara nikwo elichwagulika.

⁷ Orwo balikubiba omuyaga baligesha akazimu. Engano ekuzire kyonkai teina bikumba; telikwija kutamu njuma. N'orwo enjuma zakugyamu, abanyamahanga nibo barazilya.

⁸ Abaisiraeli bamizirwe, bagiire omu mahanga, nibashusha ekikwato kitaina mugasho.

⁹ Bakwete omuhanda bagya Asiria, nibashusha enturege elikushamanga yonkai. Efuraimu ekodesize bagendabe.

¹⁰ N'orwo balikukodesa abanyamahanga, ndi haihi kubahikanisa. Kandi barabanza balekereho okukora abakama amajuta n'okutaho abatwazi b'okubatwara.”

¹¹ “Abaefuraimu bakanyisize alutare z'okufakaliraho, zibahindukiire alutare z'okukoleraho entambara.

¹² N'orwo nakubahandikire Amateka gange 10,000, bakugaboine oti kintu ekitabayo.

¹³ Bagonza ebitambo; batamba enyana bagilya, kyonkai ebyo tindikubishemelerwa. Mbwenu naija kwijuka entambara zabo, mbabonabonyie mbature amafu gabo bagaruke Misiri.”

¹⁴ “Abaisiraeli bebirwe omutonzi wabo, bayombeka ebikaare n'Abayuda bakanyisa ebigo by'eboma. Kyonkai ebigo byabo ebyo ndabitaho omuliro gubyokye.”