Hosea 4 - Ebibulia 2001

Ruhanga namanyisa Abaisiraeli amafu gabo

¹ Inywe Baisiraeli inywe, muhulire ekigambo ky'Omukama, kuba inywe banyansi ba munu abakwete omushango. Timukiina bwesigwa aha ndagano, timukigilirangana kisha na Ruhanga timukimwetaireho.

² Nimunahira ebyo mutakore, nimugamba ebishuba, nimwita abantu, nimwiba, nimusiyana, emiku nimugichwa yona, n'okwitangana tikulekeire.

³ Nikyo ensi elikuchulira, abanyansi baraliire kukaba, kumoi n'enyamaishwa n'ebinyonyi, nangu n'enfuru nizifa.

Omukama nakwata abakuhani omushango

⁴ Omukama nagamba ati, “Omuntu n'omoi atakwata bandi mushango anga kubarwanisa. Inye mbe n'inye ngamba inywe abakuhani.

⁵ Kiro na mushana murata kujegurwa; kandi abarangi nabo bali kumoi nainywe. Nyinainywe, Isiraeli, nimwita.

⁶ Abantu bange nibafa orubi aha rw'okutanyetaho. Inywe bakuhani, ebyo ndikubegesa nimubyanga, ahonu nanye nabanga timukili bakuhani bange. Orwo mwebirwe Amateka gange nanye abana banyu ndibebwa.”

⁷ “Orwo inywe abakuhani mulikweyongera kukanya nikwo mulikunfakalira kushagaho. Mbwenu kanyije mbagore.

⁸ Eby'abantu balikukora bakafakara nibyo bilikutungisa inywe; kityo nimugonza baikare bafakaire.

⁹ Ekibonabonyio eky'embaga nikyo nainywe abakuhani mulibona. Ndibabonabonyia mbature entambara zanyu, muzire amafu ganyu.

¹⁰ Mulilya kyonkai timuliguta; mulifukamira baruhanga b'eilima kyonkai timulizara bana, enshonga munnagireho mwahondera baruhanga abandi.”

Omukama natamwa emifukamire y'ekitakansi

¹¹ Omukama nagamba ati, “Edivai, na mpya na nkuru, emaramu abantu amagezi.

¹² Abantu bange nibaraguza aha kihuuku ky'omuti! Ekiti nikyo kilikubagambira ebyo balikwenda kumanya. Okugonza obusiyani nikwo kubanagire, bakansigaho bakatera obumalaya.

¹³ Nibatamba ebitambo aha butwetwe bw'amabanga, nibahonga ebihongo aha nshozi, aha mialoni n'emilibua n'emyela aha rw'okuba miti eina ebibeho birungi. Ekilikurug'omwo bahara banyu nibatera obumalaya, kandi bakamwana banyu nibasiyana.

¹⁴ Bahara banyu tibalitera bumalaya nkabaha kibonabonyio, bakamwana banyu tibalisiyana nkabaabonabonyia. Kuba abashaija nibagenda n'abamalaya nibema n'abamalaya ba rwensinga kutamba ebitambo. Bakachwa omugani bati, ‘Obutamanya bwisa abantu.’ ”

¹⁵ “N'orwo inywe bantu ba Isiraeli mutalikungilira bwesigwa, aba Yuda batagwerwa mushango nk'ogwo. Muleke kugya Giligali anga Betiaveni kufukama anga kunahira nimugira muti, ‘Obuso bw'Omukama.’

¹⁶ Abaisiraeli baina eijegu nk'enyana y'enkiraiziba. Nakubalisa ntai nk'omwana gw'entama omu malisizo gatangaarukire?

¹⁷ Aba Efuraimu bagiire aha bihuku, baleke.

¹⁸ Orwo balikumara kutamiira bekoza eby'obusiyani; eby'enshoni nibyo balikwenda kukira eibara lirungi.

¹⁹ Baliihwa omuyaga, kandi ebitambo byabo by'ekitakansi bilibagora.”