Hosea 2 - Ebibulia 2001

¹ Kityo Abaisiraeli banyu mubete muti, “Bantu ba Ruhanga,” mushube muti, “Abagonzibwa b'Omukama.”

Gomeri omugoke - Abaisiraeli abagoke

² “Bana bange, mugambire nyinainywe, n'orwo atakili mukazi wange, nanye ntakili mushaijawe. Mumugambire aleke obusiyani n'obumalaya.

³ K'atalekeire ndamujura asigare bushai nk'okwo yakazairwe, ndamuhindura irungu, mushuse ensi y'emparamata, mwise eiliho.

⁴ N'abanabe tindibaganyira, ahakuba bahwanshoni nka nyinabo omumalaya.

⁵ Nyinabo akatera obumalaya; kibatwaranda akajanga. Kuba akagira ati, ‘Ndahondera bagenda bange, nibo bampa ekyakulya n'amaizi, bampa emyendo y'esufu n'eya kitani, bampa n'amajuta bashuba bannyoisa.’

⁶ Aha rw'ekyo omuhandagwe ndigwigaliza amahwa; nyombeke orukuta rw'okumutangisa, aliba atakibona burabo.

⁷ Alihondera bagendabe, kyonkai talibagoba; alibahiga, kyonkai talibabona. Ahanyuma aligira ati, ‘Ngende ngaruke omwa ibanye owa mbere, aha rw'okuba orwo nabaire ndi omwe nkaba ndige kushaga okwo ndi mbwenu.’

⁸ Tiyamanyaga okwo n'inye namuhaga engano, edivai n'amajuta, n'efeza n'ezahabu, ezo yakozaga kufukamira Baali.

⁹ Kityo orwo eigesha liligoba, ndigarurayo engano yange n'edivai yange, ntware n'emyendo yange y'esufu n'eya kitani, eyo nabaire muhaire kujwara.

¹⁰ Ndimujuulira omu maisho ga bagendabe, mugenze bushai; taliho alimunyihya mu mikono.

¹¹ Ndimuchwa amashemelerwa, n'ebiro bikurubye, n'amagenyige g'okwezi kwemire, na Sabato za wenene, n'ebiro bikurubye byona ebyaragiirwe.

¹² Ndiita emizabibu n'emitiniye ey'alikugamba ngu mperwaye akagihabwa bagendabe. Ndigiigaza ebe kibira enyamaishwa zigilye.

¹³ Ndimubonabonyia, muture okukolera Ababaali ebiro bikuru, kumwoteza n'obunuma. Yabajwaliraga empeta n'emilengyo y'amabare g'eiguzi nagenda kuhiga bagendabe, inye yanyebwa.” Alikugamba Mukama.

Engonzi z'Omukama aha bantube

¹⁴ “Aha rw'ekyo ndimushemashemya mutware mw'irungu, mugambire obugambo burungi.

¹⁵ Orwo tuliba tuli okwo ndimugarulira emizabibuye. Oruhanga rwa Akori ndiruhindura mulyango gw'eshubi. Alimporora nk'okwo yampororaga ali muto, omu makiro ago yarugire Misiri.”

¹⁶ Kandi Omukama nagamba ati, “Bir'ebyo olinyeta oti, ‘Mushaija wange,’ oliba otakinyeta oti, ‘Baali wange.’

¹⁷ Ndikulekeza amabara ga Baali, oliba otakigagamba rundi.

¹⁸ Bir'ebyo ndikora endagano n'enyamaishwa n'ebinyonyi n'ebyekurura. Ndichwa obuta n'embanda, mareho endashana, muture buhore emirembe.

¹⁹ Ndikushelera obe wange eirai lyona. Orwo ndikushelera ndikukolera amazima n'obwesigwa, nkugiliire obuganyizi n'ekisha.

²⁰ Ndikusheleza obwesigwa; kandi olimanya Omukama.

²¹ Makiro ago ndihorora enshara z'abantu bange ba Isiraeli. Ndigwisa enjura omu nsi,

²² kandi ensi egyo elyeza emyaka, ezabibu n'etini.

²³ Ensi ndigitekamu abantu bange mara mbagoshore, ‘Ataganyirwa,’ ndimuganyira; kandi ‘Tibantubange,’ ndibagambira nti, ‘Muli bantu bange.’ Na bonene baligamba bati, ‘Oba Ruhanga waitu.’ ”