Hosea 14 - Ebibulia 2001

Hosea natagiliza Isiraeli kugarukira Omukama

¹ Iwe Isiraeli, ogaruke aha Mukama Ruhanga wawe, aha rw'okuba entambara zawe zikusitaize.

² Ogarukire Omukama omugambire oti, “Osinge ongarulire entambara zange zona, otore ebili birungi ndashuba ahali iwe.

³ Asiria tendokora. Tindikuuba farasi, kandi tindishuba kukora bihuku kubyeta Ruhanga wange. Niiwe ogilira enfuuzi obuganyizi.”

Omukama nashubiza Isiraeli oburora buhya

⁴ Omukama nagamba ati, “Abantu bange ndibatambira obugoke; mbagonze bataina kyobampaire, ahakuba nalekeire kubagilira ekiniga.

⁵ Isiraeli ndimushusira orume, ayakye nka lilia; asimbe emizi nk'omwelezi gwa Lebanoni.

⁶ Amatagige galiba gahango, kandi alishemera nk'omuzeituni, agire n'omugaju nk'ogw'enyakyo za Lebanoni.

⁷ Isiraeli aligaruka ature omu mikono yange, ageije okw'obona ebusitani. Alyakya nk'omuzabibu, agire akatachu nk'edivai ya Lebanoni.

⁸ Iwe Efuraimu, inye ebihuuku binkweteki? Manya n'inye mporora enshara zawe; n'inye nkulinda. Nshusha omuberoshi ogutayoma, emigisha yawe yona eruga ahali inye.”

Eby'enzindo

⁹ Aina obumanyi wena ashobokerwe ebigambo ebi; ow'amagezi abimanye. Ahakuba eby'Omukama akora biba by'amazima, mara n'abali barungi nibyo bakora. Kyonkai abafakare basitara bagwa aha rw'eshonga tibabyetaho.