Hosea 13 - Ebibulia 2001

Eiramu ly'enzindo ahali Isiraeli

¹ Efuraimu kayabaire agamba, abantu bajugumba; omuli Isiraeli bamuhaisilizaga. Kyonkai akafukamira Baali entambara egyo yamurugiramu rufu.

² Na mambwenu bakyazigiliire kufakara. Efeza yabo nibagiheshamu ebihuuku; ebihuuku byona nibikorwa ababuya. Nibashuba nibagambira banu bati, “Mutambire baruhanga aba ebitambo.” Abantu nibanywegera ebishushani by'enyana!

³ Aha rw'ekyo balishusha oruho rwa bwankya, anga orume orutaikara kwamuuka. Baliharara nk'omushunga aha rwano, anga omwika oguletwa omw'idirisha gukahwera eiguru.

⁴ Omukama nagamba ati, “Inye mba Mukama Ruhanga wanyu ayabaihire Misiri. Taliho Ruhanga ondijo owo mulikumanya shana inye. Kandi atali inye taliho murokozi ondijo.

⁵ N'inye nabamanyaga omw'irungu, omu nsi y'omushana gungi.

⁶ Nawe kamwaliire mukaiguta, mukahaga, mwayekuza, nikwo kunyebwa.

⁷ Kityo ndibahindukira ntare, mbazimbire aha muhanda nk'engoi.

⁸ Ndibagurukira nk'edubu eyakirwe ebyana byayo, mbatagure nk'ekikaaka, mbaase ebifuba, mbalireyo nk'entare.”

⁹ “Iwe Isiraeli, ndikusilikya; kyonkai n'ohai alikunjuna?

¹⁰ Mbwenu omukama wanyu alihai akabajuna? Balihai abatwazi banyu bakabalinda? Abo mwagambaga muti, ‘Otuhe omukama n'abatwazi!’

¹¹ Abakama nkababaha nigaire, nashuba nababaihyaho ntamirwe muno.”

¹² “Entambara ya Efuraimu ehandikirwe, obufubwe nimbwekomya.

¹³ Nayaiga nk'omukazi alikurumwa, kyonkai aba mwana ataina magezi. Nashusha enda elikusindikirwa ekanga kuturuka.

¹⁴ Nimugira ngu ndichungura Abaefuraimu mbaihye omu mikono ya Sheoli? Mbachungure ahali Rufu? Iwe Rufu iwe, bilihai ebibundo byawe eby'oteza banu? Galihai amani gawe iwe Sheoli ag'osiliikisa banu? Tinkyakugilira mbabazi.

¹⁵ N'orwo Efuraimu yakugeija nk'ekifunjo, ndisindika omuyaga gw'oburugaizoba, gwihye gwemire omw'irungu. Enchuroye elyomeera n'eizibalye lyome gelegere. Omuyaga ogwo buhanika guligimaramu buli kamoi ak'eiguzi.

¹⁶ Samaria nayo elikwatwa omushango orwo eshengire Ruhanga wayo. Baligwa aha mbanda, obwana bwabo babukankabure ahansi, n'abakazi babo abaliba baina enda balibafumura amabunda.”