Hosea 12 - Ebibulia 2001

¹ “Efuraimu nakora obusha, omushana nabinga omuyaga gw'oburugaizoba. Abaefuraimu bagambire ebishuba bakora n'obukatili bashagulirana. Nibakora emikataba hamoi na Asiria, kandi nibaguza Misiri amajuta.

² Omukama aina omushango ahali Yuda. Alibonabonyia Yakobo aha rw'eby'alikukora, amuhe ekibonabonyio kumutura ebigirobye.

³ Orwo Yakobo yabaire ali omu nda ya nyina akakwata omurumuna ekisinziro, kandi kayabaire yabaire mushaija yafukana na Ruhanga.

⁴ Akafukana n'omumalaika yamusinga, yashuba yataka yamushaba omugisha. Kayabaire ali Betheli yabonangana na Ruhanga, Ruhanga yamugambira ekigambo.

⁵ Omukama Ruhanga w'amahe, ‘Mukama,’ nilyo ibaralye.

⁶ Aho mbwenu inywe baijukuru ba Yakobo, mwesige Ruhanga wanyu mumugarukire. Mube besigwa mugire amazima, mushube mulinde n'eshubi mwije mubone Ruhanga eky'alibakolera.”

⁷ Omukama nagamba ati, “Omutunzi akwete eminzani elikupima ebitagobire, nagonza okushasa banu.

⁸ Efuraimu agambire ati, ‘Ndi mutungi, eitunga ndiboine;’ kyonkai eitungalye lyona tilyakwiza ntambara ez'akozire.

⁹ Omukama Ruhanga wanyu aba inye ayabaihire Misiri. Ndishuba mbatuze omu mahema nk'okwo mugaikaramu omu biro bikuru ebiragiirwe.”

¹⁰ “Nkagambira abarangi, n'inye naikaire nimbabonekera, mara omu kanwa k'abarangi n'inye nachwaga emigani.

¹¹ Kyonkai leba, omuli Gileadi bakyafukamira ebihuuku, mara nikwo barafa. Orwo balikutamba ente ebitambo omuli Gileadi, na alutare zabo zilishusha entuumiro z'amabare omu ndimiro.”

¹² Yakobo akaba ahungiire Aramu; kugya kubona omukazi akagira owo yakolera, yamulisiza entama.

¹³ Omukama akataho omurangi w'okwihya Abaisiraeli Misiri, omurangi ogwo yaba niwe abakiza.

¹⁴ Abaefuraimu banigaize muno Omukama; kityo alibabonabonyia aha rw'entambara z'obwitabantu, abature okumugora okwo bamugoire.