Hosea 1 - Ebibulia 2001

¹ Ekigambo eki Omukama akakigambira Hosea eya Beri, omu makiro ga Uzia, Yotamu, Ahazi na Hezekia abakama ba Yuda, nomu makiro ga Yeroboamu eya Yoashi omukama wa Isiraeli.

Muka Hosea n'abaanabe

² Orwo Omukama yabandize kugambira omu kanwa ka Hosea, akamugambira ati, “Ogende oshwere omumalaya, omuzareho abana bamurondore. Nikwo n'ensi egi yangokera ekashagulirana orwo ensigireho.”

³ Nikwo Hosea kugenda akashwera Gomeri muhara wa Dibilaimu. Gomeri atwara enda amuzalira omwana w'omwojo.

⁴ Omukama agambira Hosea ati, “Omwete Yezireeli kuba hasigara akanya kake nyije mbonabonyie eka ya Yehu mbature abantu abo yaitiire Yezireeli, kandi malireho kimoi obukama bwa Isiraeli.

⁵ Kiro kyonene ekyo omu Ruhanga rwa Yezireeli, Abaisiraeli ndibamaliraho kimoi amani g'endashana.”

⁶ Gomeri ashuba atwara enda azara omwisiki. Omukama agambira Hosea ati, “Omwete Ataganyirwa, kuba Abaisiraeli tindibaganyira rundi. Tindibagarulira n'akati.

⁷ Nawe ab'oruganda rwa Yuda abo ndibaganyira. Inye Omukama Ruhanga wabo ndiberokolera. Mara tindibarokoza buta, anga mbanda, anga ndashana, anga farasi, anga ab'efarasi.”

⁸ Gomeri kayachukize Ataganyirwa atwara enda azara omwana w'omwojo.

⁹ Omukama agambira Hosea ati, “Omwete Tibantubange, kuba inywe timukili bantu bange, nanye tinkili Ruhanga wanyu.”

Abaisiraeli baliganyirwa

¹⁰ Kyonkai Abaisiraeli baliba bangi nk'omushenye gw'enyanja ogutakupimwa anga kubarwa. Mbwenu Ruhanga nabagambira ati, “Timukili bantu bange.” Kyonkai ekiro kiliho orwo alibagambira ati, “Muli bana ba Ruhanga Asingire.”

¹¹ Nirwo aba Yuda n'aba Isiraeli baliterana hamoi bakataho omukuru omoi, mara omu nsi yabo baligoshoka. Mazima ekiro kya Yezireeli kiliba kikuru mara ky'okutangaza.