Hagai 2 - Ebibulia 2001

Oburungi bwa Rwensinga Empya

¹ Aha kiro kya makumi gabili na kimoi ky'omwezi gwa mushanju, omu mwaka gwa kabili ogwo, Omukama Dario aliire engoma, Omukama akashuba yagambira omu kanwa k'Omurangi Hagai.

² Akaragira Hagai kugambira Zerubabeli eya Shealisieli, gavana wa Yuda, na Yoshua eya Yehozadaki, Omukuhani Nyamukuru, n'Abaisiraeli bona ensigalira, ati,

³ “Omuli inywe ensigalira alimu ayaboine Rwensinga eya mbere okwo yabaire eli nungi? Mbwenu egi nimugibona mutai? Telikwelenga n'akake hahali elinya eya mbere.

⁴ Kyonkai mutashuba nyuma, iwe Zerubabeli, na iwe Yoshua eya Yozadaki, Omukuhani Nyamukuru, n'abanyansi inywena. Omulimo mugukore, aha rw'okuba ndi hamoi na inywe, inye Omukama w'amahe.

⁵ Nk'okwo nabaraganisize, orwo mwabaire nimuruga Misiri. Mutatina, ndi hamoi na inywe.

⁶ Alikugamba n'inye Omukama w'amahe. Omu kanya kake ndashuba njugumbise eiguru n'ensi, enyanja n'orukaru.

⁷ Ndabumbwigya amahanga gona, eitunga lyago lyona lije munu, nyije ndengye muno Rwensinga egi. Alikugamba n'inye Omukama w'amahe.

⁸ Efeza eba yange, n'ezahabu eba yange. Alikugamba n'inye Omukama w'amahe.

⁹ Rwensinga egi eya kakyo aka neija kukiza eya karai oburungi. Alikugamba n'inye Omukama w'amahe. Kandi ensi egi ndagigoshora. Alikugamba n'inye Omukama w'amahe.”

Omurangi nabaza abakuhani

¹⁰ Aha kiro kya makumi gabili na binai ky'omwezi gwa mwendai, omu mwaka gwa kabili ogw'omukama Dario aliire engoma, Omukama w'amahe akashuba yagambira omu kanwa k'Omurangi Hagai.

¹¹ Akamugambira ati, “Ogambire abakuhani bashare ekigambo eki.

¹² K'omuntu yakwiha enyama aha kitambo akagitwara omu mukugiro gw'ekijwarokye, omukugiro ogwo gukakwata aha mukate, anga aha bugali, anga aha divai, anga aha majuta, anga aha kyakulya ky'engeli yona yona, ekyakulya ekyo kyakuhinduka kitakatifu?” Abakuhani bamuhorora bati, “Ekyakulya ekyo nikihagara.”

¹³ Ahanyuma Hagai ababaza ati, “K'omuntu wena wena alikugoba aha mufu akahagara, akashuba akakwata aha kintu kyona kyona nk'ebi, ekintu ekyo nikihagara?” Abakuhani bamushubamu bati, “Nikihagara.”

¹⁴ Aho Hagai abagambira ati, “Nikwo n'Omukama alikubona atyo abantu aba: Nilyo ihanga eli. Omukama wenene niwe alikugamba atyo. N'ebyo balikukora n'ebyo balikuhonga alutare bihagaire.”

Omukama nashubiza Isiraeli omugisha

¹⁵ Omukama aho agamba ati, “Mbwenu nimbatagiliza murayekomya ebilikwija kubaho kwema kir'eki kugya omu maisho. Orwo mwabaire mutakabandize kwombeka Rwensinga y'Omukama egi ey'eibare,

¹⁶ mukaba muli mutai? Orwo omuntu yagyaga mbali engano ebiikire nashubira kushangamu ey'obusikizi bw'ekilo 200, ashangamu ey'ekilo 100. Agye omw'isinga kutaha elita 100 z'edivai, nashangamu elita 40.

¹⁷ Inye nkaleta omushana ibarura matoju n'orubare byaita byona ebyo mwabaire mulimire, kyonkai na honene aho timwayechulize. Alikugamba n'inye Omukama.

¹⁸ Kwema kir'eki ekya makumi gabili na binai eky'omwezi gwa mwendai kugya omu maisho murayekomya ebirabaho. Mwijuke kuruga kir'ekyo eky'omusingi gwa Rwensinga y'Omukama gwabanza kwombekwa:

¹⁹ Omutwaro tigukinamu kantu. Kandi kugoba mwaha, omuzabibu, omutini, omukomamanga n'omuzeituni, emiti egyo tekarabire. Kyonkai kwema kir'eki ndabaha omugisha.”

Omukama anshubiza Zerubabeli omugisha

²⁰ Aha kiro kya makumi gabili na binai ky'omwezi, Omukama agambira Hagai omurundi gwa kabili, ati,

²¹ “Ogambire Zerubabeli, gavana wa Yuda oti, ‘Ndi haihi kuletera eiguru n'ensi omusisi;

²² engoma z'amahanga nzisilikye nzirandamure, amagali ngasinjagulikye, n'abagakuubire mbaite kayaba. Efarasi zirafa, n'abazikuubire bazikuntukeho, baisangane embanda.

²³ Kir'ekyo inye Omukama w'amahe nkugambire iwe Zerubabeli omwiru wange, iwe Zerubabeli eya Shealisieli, ndikukwata nkuhindure mpeta y'omuhuri, ahakuba nkuronkire. Alikugamba n'inye Omukama w'amahe.’ ”