Hagai 1 - Ebibulia 2001

Omukama naragira kwombeka buhya Rwensinga

¹ Aha kiro kya mbere ky'omwezi gwa mukaga, omu mwaka gwa kabili omukama Dario aliire engoma, Omukama Ruhanga akagambira Zerubabeli eya Shealisieli, gavana wa Yuda, na Yosia eya Yehozadaki, Omukuhani Nyamukuru omu kanwa k'Omurangi Hagai, ati,

² “Omukama w'amahe nagamba ati, ‘Abantu aba nibagamba okwo amakiro g'okwombeka buhya Rwensinga gatakagobire.’ ”

³ Aho Omukama wenene ashuba agamba omu kanwa k'Omurangi Hagai, ati,

⁴ “Inywe bantu bange inywe, amakiro gagobire ago inywe kutura omu maju agalengiibwe embaho, kandi okwo Rwensinga egi eli omu matongo?

⁵ Mutekeleze emikaliire yanyu.

⁶ Mulimire bingi kyonkai mwagesha bike; nimulya, kyonkai taliho orwo mulikwiguta; nimunywa, kyonkai taliho orwo mulikulihuka; emyendo nimujwara, kyonkai taliho orwo mulikutagatirwa. Alikubona omushara nagubona kuguteka omu nshaho y'ebihuru.”

⁷ “Mutekeleze emikaliire yanyu.

⁸ Mutembe omu mabanga mulete emiti mwombeke buhya Rwensinga. Aho ndashemelerwa mara mpabwe ekitinwa okwo ndikugonza.

⁹ Mubaire nimushubira kugesha bingi, kyonkai amagesha ganyu gafura. Mwagaleta omuka, nagatuntumura. Kubaki? Kuba Rwensinga yange eli omu matongo, okwo inywe buli muntu nahyahyana kwombeka enju eye.

¹⁰ Nikyo enjura etalikugwera, n'ebintu nikyo bitalikumelera.

¹¹ Njwisize omushana gungi omu nsi: Omu mabanga, omu misiri, omu ndimiro z'emizabibu n'ez'emizeituni, gwayomesa buli mwaka ogukalimwa omw'itaka; buli kamoi ako mulikulenga kulima nikoma; gwakangaranisa abantu n'ebitunganwa.”

Abantu nibahulira omuhango gw'Omukama

¹² Aho Zerubabeli eya Shealisieli, na Yoshua eya Yehozadaki Omukuhani omukuru muno, n'Abaisiraeli bona ensigalira, bahulira eiraka ly'Omukama Ruhanga wabo na byona ebyo Omukama Ruhanga wabo yatumire omurangi Hagai kubagambira. Abantu bona bakatina Omukama.

¹³ Ahanyuma Hagai, entumwa y'Omukama, agambira embaga eky'Omukama amutumire ati, “Omukama nagamba ati, ‘Inye ndi hamoi nainywe.’ ”

¹⁴ Omukama akyanulira Zerubabeli eya Shealisieli, gavana wa Yuda, Yoshua eya Yehozadaki Omukuhani Nyamukuru, n'Abaisiraeli bona ensigalira; bakwata omuhanda bagya kwombeka Rwensinga y'Omukama w'amahe, Ruhanga wabo. Batandika.

¹⁵ Kikaba kili kiro kya amakumi gabili na binai ky'omwezi gwa mukaga.