Filemoni 1 - Ebibulia 2001

¹ Inye Paulo, omufungwa aha rwa Yesu Kirisito, na Timotheo murumuna waitu, nitukuhandikira iwe Filemoni omukozi mutahi waitu omugonzibwa,

² na Afia munyanyaichwe, na Arikipo omwisherukare mutahi waitu, n'enteko elikuteranira omwawe.

³ Ruhanga Isheichwe n'Omukama waitu Yesu Kirisito basinge babatunge omugisha n'emilembe.

Esiimi

⁴ Buli kaanya ninsiima Ruhanga wange orwo ndikukwijuka omu nshara zange,

⁵ ahakuba nimpulira okwo oina engonzi n'okwesiga aha Mukama Yesu, n'okwo olikugonza abakirisito bona.

⁶ Ninkushabira okwesiga okw'olikwegesa abandi kube kw'ebikorwa mara kushobore kumanyisa abantu ebirungi byona ebyo tulikushobora kukora tujwangaine na Kirisito.

⁷ Nobona murumuna wange okugonza kwawe kukampa ebyera bingi nk'okummaramara, kuba noshemeleza abakirisito.

Paulo natelera Onesimo omushango

⁸ Niyo nshonga n'orwo ndikushobora kumaza nyemirwemu Kirisito kukuragira kukora eky'olikuragirwa kukora,

⁹ aha rw'engonzi zawe nimbona hakili nkutagilize, inye Paulo omubaka wa Yesu Kirisito, kyonkai mbwenu ndi mufungwa aha rwa wenene.

¹⁰ Ninkutagiliza, nintagililiza omwana wange Onesimo. Onesimo ogu mbaire ishe omu kufungwa kwange.

¹¹ (Orwa mbere akaba ataina mugasho ahali iwe, kyonkai mbwenu ntakubeihire natugasha ichwembili, iwe nanye).

¹² Namukugarulira, namukutwekera ali wange buchwichwi.

¹³ Nakushemeleirwe kwikara nawe k'anjuna ebyo iwe wakunjunire orwo ndi omu kifungo nibantura evangeli.

¹⁴ Kyonkai mboine ntakora kantu otaikiliize otaija okankundira aha rw'okugimbwa, onkundire obuzira kukakwa.

¹⁵ Shana rundi nikyo abaire akurugiireho akaanya kake ahanyuma oshobore kuba hamoi nawe ebiro byona,

¹⁶ atakili mwiru: Yashaagire omwiru, yabaire murumuna waitu omugonzibwa. Omuno ni murumuna wange inye, kyonkai kandi ahali iwe nashaagaho: Ni murumuna wawe aha rw'enshoga muntu mara kandi ni murumuna wawe aha kujwangana nawe omuli Mukama.

¹⁷ Kityo k'oraba nobona ndi mutaahi wawe, omutore nk'okwo wakuntoire.

¹⁸ Kandi k'araba yakufakaliire, anga oina eky'olikumutonga, ebyo obitonge inye.

¹⁹ Inye Paulo nyenene n'inye ndikwehandikira, ndabigira, ntagambire okwo naiwe oina eibanja lyange, eibanja lyange elyo n'iwe wenene.

²⁰ Nikwo, murumuna wange, ninkutaho Mukama onkolere akagambo aka. Ongaruremu akoyo, iwe murumuna wange owo tujwangaine omuli Kirisito.

²¹ Ninkuhandikira nyesigire okw'orampulira, nangu nimanya okw'orakora ebikizireho ebyo nagamba.

²² Omu kaanya konene ako ontekatekere oburaaro, kuba ninshubira okwo omu nshara zanyu ndabagarukira.

²³ Epafurasi, omufungwa mutahi wange alikuturwa Yesu Kirisito, nakukeisa,

²⁴ kutyo na Mariko, Arisitariko, Dema na Luka, abakozi bataahi bange.

²⁵ Omugisha gw'Omukama Yesu Kirisito gube naiwe.