Ezira 3 - Ebibulia 2001

Okufukamira Ruhanga nikushubaho

¹ Omwezi gwa mushanju kwija kugoba, Abaisiraeli ababaire bali omu bigo, bona bahurulira Yerusalemu n'eiraka limoi.

² Aho Yeshua eya Yozadaki, aimuka n'abakuhani batahibe na Zerubabeli eya Shealisieli, n'abanyarugandabe bombeka altare ya Ruhanga wa Isiraeli kugihongaho ebihongo by'okwokibwa, nk'okwo byahandikirwe omu Mateka ga Musa omwiru wa Ruhanga.

³ Altare bagiteka mbali eya mbere yabaire eli, aha rw'okuba bakaba nibatina abanyamahanga ababaire batwire omu nsi egyo. Bagihongeraho Omukama ebihongo by'okwokibwa bwankya na bwaigoro.

⁴ Bekomya Ekiro Kikuru ky'Ensisira nk'okwo kihandikirwe, mara buli kiro bahonga ebihongo by'okwokibwa orubara oruragiirwe kuhonderana n'omugenzo, nk'okwo kyaragirwaga buli kiro.

⁵ Ebyo kabyabaire byahoire hahonderwa ebihongo by'okwokibwa eby'orubeelera, ebihongo aha kwezi kwemire n'aha biro bikuru by'Omukama ebiragiirwe, n'ebihongo bya buli muntu eby'okuhongera Omukama bili by'obweyendezi.

⁶ Kwema ekiro kya mbere ky'omwezi gwa mushanju batandika kuhongera Omukama ebihongo by'okwokibwa. Kyonkai ekitebe kya Rwensinga kikaba kitakombekirwe.

⁷ Kityo baha abombeki n'abaselemara empiha, babaha n'ebyakulya n'eby'okunywa, kandi baha Abasidoni n'Abatiro amajuta babone kwihya emiti y'emielezi Lebanoni kugileta aha nyanja, kugigobya Yopa, kuhonderana n'orubara orwo Koreshi omukama wa Perisia yabaire abahaire.

⁸ Omu mwaka gwa kabili kwema baizire ahali Rwensinga ya Ruhanga omuli Yerusalemu omu mwezi gwa kabili, Zerubabeli eya Shealisieli na Yeshua eya Yozadaki, batandika elyombeka hamoi n'abarumuna babo abakuhani n'Abalevita na bona ababaire bagarukire Yerusalemu barugire omu buzahe. Bataho Abalevita kwema ab'emyaka 20 n'okushaga kulebelera elyombeka lya Rwensinga.

⁹ Yeshua n'abatabani, n'abanyarugandabe, na Kadimieli n'abatabani (nibo baijukuru ba Yuda), bema hamoi kulebelera abakozi ba Rwensinga ya Ruhanga, bemire hamoi na batabani ba Henadadi n'Abalevita, batabani babo n'abanyaruganda babo.

¹⁰ Abombeki kabataireho ekitebe kya Rwensinga, lileta abakuhani bambaire enyambarwa zabo, baina amakondere, n'Abalevita baijukuru ba Asafu baina enkunturo kuhaisiliza Omukama nk'okwo Daudi omukama wa Isiraeli yabaire abolekeleire.

¹¹ Bahoya nibahororangana, nibahaisiliza Omukama nibamusima bati, “Omukama aba murungi, n'ekishakye kiikara kyolekeire ahali Isiraeli eirai lyona.” Embaga yona etokera, bahaisiliza Omukama aha rw'enshonga y'elyombeka ly'ekitebe kya Rwensinga kutandika.

¹² Kyonkai abakuhani n'Abalevita abangi n'abakuru b'amahiga, abagurusi ababaire baboine Rwensinga eya mbere kabaaboine elyombeka ly'ekitebe kya Rwensinga eya kabili nilitandika, bachura muno, n'orwo bangi babaire nibatokera.

¹³ Kityo, abantu tibashoboire kushorora maraka galikutokera mu maraka g'abalikuchura, enshonga abantu bakatamu orusharo, n'orutokero rwagoba harai.