Ezekieli 7 - Ebibulia 2001

Amaheleruka ga Isiraeli gali haihi

¹ Omukama akangambira ati,

² “Mwana w'omuntu, ebi nibyo inye Omukama Ruhanga ndikugambira ensi ya Isiraeli! Ensi yaija kuheleruka yona!

³ Mbwenu mwaija kuheleruka! Ninyija kubanigalira nkabaramura kuhonderana n'ebikorwa byanyu. Kandi ndababonabonyia nimbatura amahano gona ago mukozire.

⁴ Ninyija kubunyia amaisho ntabaganyira; tindikwija kubashasira. Ndabaabonabonyia aha rw'ebigiro byanyu n'amahano ago mukozire. Aho mwije mumanye okwo mba Mukama.”

⁵ Omukama Ruhanga nagamba ati, “Ekibundo aha kindi! Ebibundo byaija.

⁶ Amaheleruka gagoba, amaheleruka gagoba; gabagobera. Leba gagoba.

⁷ Inywe banyansi, akanya kagoba, ekiro kili haihi, ekiro ky'enaku, ekitali kiro kya byera aha mabanga.

⁸ Ndi haihi kubamaliraho ekiniga, mbanigaliire, mbaramure kuhonderana n'ebyo mukozire. Kandi ninyija kubabonabonyia nkabatura amahano ago mukozire.

⁹ Ninyija kubunyia amaisho ntabaganyira, tindikwija kubashasira. Ndabaabonabonyia nk'okwo mukozire, mukozire amahano. Aho mumanye okwo mba Mukama, Omukama abonabonyia.”

¹⁰ “Leba, ekiro ekyo! Leba, kyagoba! Ekiro ky'enaku kyagoba. Okutakoza mazima kwashagulirana; eikuru lyalenga.

¹¹ Obukatili bwayehenenga. Tasigarweho muntu n'omoi. Ebintu byabo ebitali bike, n'eitunga lyabo, n'ekitinwa kyabo, birahwaho byona.

¹² Akanya kagoba, ekiro nikyo. Omuguzi atashemelerwa, kandi omuguza atachura, aha rw'okuba ekibonabonyio ky'embaga yona.

¹³ Omuguza ekyo yagulize talikibona rundi akyarora, kuba Ruhanga anigaliire embaga yona, kandi talikwija kubaganyira. Bona taliho arasigaraho aha rw'entambara zabo.”

¹⁴ “Bateire enzamba, buli omoi yayetekateka, kyonkai taliho alikutabara, ahakuba nigaliire embaga yona.

¹⁵ Aheru batangirwe embanda, omunda endwara n'eifa bibemire kubi. Ali aheru naitwa embanda; ali omu kigo naitwa enjara n'endwara.

¹⁶ Kandi kahaligira abahonokaho, abo balihungira omu mabanga okw'obona ebiiba by'omu mpanga. Balichura bona, buli omoi achuzibwe entambaraze.

¹⁷ Bona emikono elibalebera, n'entege zorobe, zorobe jegejege.

¹⁸ Obutiini bulibamara, bajware engunia, bona bagire enshoni aha maisho, emitwe yona emoke empara.

¹⁹ Efeza yabo baligijugunya omu mbarabara, n'ezahabu yabo telishobora kubajuna kiro ekyo Omukama alibanigalira. Tizilibamara njara, kandi tizilibaigusa. Enshonga efeza n'ezahabu nibyo byabateire eishaija, bakafakara.

²⁰ Bakajwara emilengyo emirungi bayelingilika, kandi emilengyo egyo bagikoramu ebishushani n'ebintu ebindi eby'amahano. Orw'ekyo ndabihindura bintu ebihagare ahali bonene.

²¹ Nshube mbiinage omu mikono y'abanyamahanga, babinyage, n'omu mikono y'abantu ababi babihagaze.

²² Ndabaleka bahagaze Rwensinga yange entakatifu muno; abanyagi bagitahemu bagihagaze,

²³ bagihindure matongo.” “Nk'okwo ensi eijwire obwitamuntu, ekigo kikaijura eitima,

²⁴ nikwo ndileta amahanga agabi muno gatware amaju gabo. Ndibamara amani agabateza eishaija, na mbali balikufukamira halihagara.

²⁵ Orwo balibangaranwa emyoyo balyenda emilembe, kyonkai tibaligibona.

²⁶ Enaku zilisimangana emitwe, habeho orukuru aha rundi, babaze nk'omurangi aina ekyo yabonekeirwe, kyonkai omukuhani aliba atakikwata Mateka, n'abagurusi baliba batakihanura.

²⁷ Omukama alichura, omutwazi ahige obugyo n'obuleko, n'abanyansi batine basharare emikono. Ndibakora kuhonderana n'ebyo balikukora, mbaramure nk'okwo emiramulire yabo eli; balimanya okwo mba Mukama.”