Ezekieli 4 - Ebibulia 2001

Ezekieli nashura okubundwa kwa Yerusalemu

¹ Ruhanga akangambira ati, “Mbwenu iwe mwana w'omuntu, okwate eitofari, olyeteke omu maisho, olichoreho ekigo kya Yerusalemu.

² Ekigo ekyo okitere ensinde okyombekere eboma, eboma ey'okutanga abali omu kigo kwiruka, oshube okizingoze enchuma z'emiti ez'okwija kukisitiza.

³ Okwate ekishate ky'ekyoma okyemeleze omu maisho gawe, kibe eboma y'ekyoma ahagati yawe n'ekigo. Ekigo ekyo oikare okilebire kishushe ekibunzirwe, okibundire kimoi. Aka kabonero aha ihanga lya Isiraeli.”

⁴ “Ahanyuma obyamire orubaju rwa bumosho, ekibonabonyio ky'eihanga lya Isiraeli nkiteke ahali iwe. Ebiro eby'oramara obyamire obumosho oraragirwa kwemera ekibonabonyio aha rwabo.

⁵ Nakutaho ebiro 390, nirwo rubara rw'emyaka eyo balimara omu kibonabonyio. Ebyo nibyo biro eby'oraragirwa kwemera ekibonabonyio aha rw'eihanga lya Isiraeli.

⁶ Orwo oraba wagobize ebiro ebyo, orashuba obyame, kyonkai eli nobyamira obulyo, oyemere ekibonabonyio aha rw'oruganda rwa Yuda. Ninkutaho ebiro 40: Ekiro kimoi nigwo mwaka gumoi.

⁷ Kandi orahanga Yerusalemu amaisho ebunzirwe, oku ofungiliize emikono, oshube orange ebilikwija kugwera ekigo ekyo.

⁸ Ninyija kukukoma emiguha oburwe agahinduka rubaju oru n'oru, kuhika orwo orahikya ebiro ebyo oramara obunzirwe.”

⁹ “Iwe wenene okwate engano n'eshayiri, empelege n'enkore, omugusha n'oburo, obite omu nyungu emoi obigoyerane. Omu biro 390 eby'oramara obyamire orubaju rwa bumosho, orata kulya ekyakulya ekyo.

¹⁰ Orata kulya omurundi gumoi buli kiro, mara ekyakulya ky'orata kulya kibe ky'obusikizi bw'eshekeli.

¹¹ Kandi n'amaizi ag'orata kunywa, limoi lyonkai buli kiro, nago gabaliliire, orata kunywa ebikompe bibili bishai.

¹² Ekyakulya ekyo ote nokilya kili nk'obubumbuli bw'eshayiri, kandi okichumbise omwejuno gw'abantu mbali olikushobora kubonwa abantu.”

¹³ Omukama ayeyongera agamba ati, “Oku nikwo Abaisiraeli baralyaga ebyakulya bihagaire, orwo barabaga bali omu mahanga ago ndabaanagamu.”

¹⁴ Ahanyuma mugira nti, “Waitu Mukama Ruhanga! Leba, inye tinkehagazaga. Kuruga ndi muto kugoba mwaha tinkalyaga kitunganwa ekyefeleire anga ekitaguju; nangu n'enyamaishwa elikuzira tinkagilyaga.”

¹⁵ Aho nirwo yangambire ati, “Mbwenu ninyija kukujubura, omwejuno gw'abantu oguleke, obusha bw'ente obe nibwo ochumbisa ekyakulya kyawe.”

¹⁶ Ayeyongera angambira ati, “Mwana w'omuntu, oraleba! Ninyija kuleta enjara omuli Yerusalemu. Ekyakulya baralya ekipimirwe mara bakilye emitima ebemeleire. N'amaizi baranywa agabaliliire, mara nago baganywe nibabangaranwa emyoyo.

¹⁷ Ekyo ninyija kukikora kababurwa ekyakulya n'amaizi, balebangane bashobeirwe, babonabone bahwe aha magufa.”