Biblia Todo Logo
Bìoball air-loidhne

- Sanasan -

Ezekieli 3 - Ebibulia 2001

1 Ruhanga akangambira ati, “Mwana w'omuntu, ebyo bakuha obilye. Ekitabo eki okilye. Oshube ogende ogambire Abaisiraeli.”

2 Kityo nyashamura akanwa, ampa ekitabo kukilya.

3 Angambira ati, “Mwana w'omuntu, ekitabo eki ekyo nakuha okilye okiigute.” Aho nkilya, mara kinnulira nk'obwoki.

4 Ahanyuma Ruhanga angambira ati, “Mwana w'omuntu, ogende omu BaIsiraeli obagambire ebyo nakugambira.

5 Enshonga tinakutuma mu bantu ba rulimi orwo otalikumanya anga orulikuguma. Nakutuma omu BaIsiraeli,

6 tinakutuma mu mahanga gangi ag'endimi ez'otalikumanya, ezilikuguma, ab'okugamba otashobokeirwe. Mara kandi kuba naba nkutumire ahali aba, bakukuhulilize.

7 Kyonkai Abaisiraeli tibalikwija kukuhuliliza. Tibalikukunda kumpuliliza, enshonga bona nibaguma emitwe, baina elyeleme.

8 Leba, nakugiza eijegu mara naiwe waguma omutwe nka bonene.

9 Nakuha okuguma omutwe nk'ealumasi eguma kukira enyondobare. Otakubatina, handiki bonene kukuleba okahahanwa, orw'okuba ihanga ly'abashengi.”

10 Kyonkai kandi ashuba angambira ati, “Mwana w'omuntu, ebyo ndakugambira byona obihulilize mara obyekomye.

11 Ogende omu mbohe, Abaisiraeli batahi bawe, obagambire oti, ‘Omukama Ruhanga nagamba ati,’ balikahulira anga bakanga kuhulira.”

12 Aho Mwoyo anshutura, mara nirwo Omukama w'ekitinwa yabaire naruga mbali yabaire asingiire, nshuba mpulira omusisi gw'amani enyuma yange.

13 Amapapa g'ebitondwa ebiina oburora nigo gabaire nigahinda orwo gabaire nigagobangana; n'amagurudumu agabaire gabili aha rubaju nigahindira muhanda: Ebyo nibyo byabaire nibihinda nk'omusisi gw'amani.

14 Mwoyo anshutura antwara, Omukama omushobora muno asingira omuli inye, ngenda nshobeirwe ntamirwe muno.

15 Ngoba omu bazahe ababaire nibatura Telabibu, bwatana aha Mwiga gwa Kebari. Nkamara ebiro mushanju mbashuntamiremu nshobeirwe.


Omukama naragira Ezekieli kuba mulinzi

16 Ebiro mushanju kabyakeire, Omukama yangambira ati,

17 “Mwana w'omuntu, nakutaho kuba mulinzi w'Abaisiraeli. Buli orwo ndakuragira kugira ekyo wabatatira, obagambire.

18 Kandagambira omuntu omubi nti, ‘Noija kufa iwe!’ okabura kumutatira, otamutatire akeshubaho, akarokoka, omuntu mubi ogwo entambaraze arazigwamu. Kyonkai n'orwo yafa, ndimukubaza.

19 Nawe k'oramutatira ateshubireho, ateteire mubwi aha itama, entambaraze nazigwamu. Kyonkai iwe oraba oyerokoire.

20 Kandi omugorogoki k'arahinduka akafakara, mara nkamukanga, k'oraba otamutatire, obufubwe buramwisa. Ebikorwabye ebirungi nabyo tibilijukwa. Kyonkai ndimukubaza.

21 Nawe omugorogoki ogwo oije omutange okufakara, ashube aburwe kufakara, ogwo ararora aha rw'okuhanwa akahulira. Kandi naiwe oraba oyerokoire.”


Ezekieli nahinduka mutita

22 Kanabaire nkyali Telabibu, mpulira okwo Omukama omushobora asingiire omuli inye, angambira ati, “Oimuke ogye omu ruhita, k'oraba wagobireyo nyije nkugambire.”

23 Kityo nyimuka ngya omu ruhita. Nshangayo Omukama w'ekitinwa ayemeleire, nk'okwo nabaire muboine aha Mwiga gwa Kebari. Aho ngwa njumaire.

24 Kyonkai Mwoyo antahamu anyimukya, anyemeleza. Angambira ati, “Ogende oyekingirane omwawe.

25 Mara iwe, mwana w'omuntu, barakubohesa emiguha, obe otakigoba mu bantu.

26 Kandi ndakukoma orulimi obe mutita, obe otakishobora kutatira ihanga eli ely'abashengi.

27 Kyonkai orwo ndashuba kukugambira, ndakuha obushobora kugamba, obagambire oti, ‘Omukama Ruhanga nagamba ati,’ Arahulira ahulire. Arayanga kuhulira ayange; manya ihanga ly'abashengi.”

Ruhaya DC Bible © Bible Society of Tanzania, 2001.

Bible Society of Tanzania
Lean sinn:



Sanasan