Ezekieli 2 - Ebibulia 2001

¹ Ruhanga akangambira ati, “Iwe mwana w'omuntu, imuka oyemelere ngambe naiwe.”

² Orwo yabaire nangambira, Mwoyo yantahamu yanyimukya yanyemeleza, namuhulira okwo alikungambira.

³ Akangambira ati, “Iwe mwana w'omuntu, ninkutuma aha BaIsiraeli, eihanga ly'abashengi. Banshengire, baishenkurubo bakanshenga, mbwenu n'aba banshengire kugoba na kir'eki.

⁴ Mara abantu abo baina elyeleme n'ekyeju. Nimbakutumaho, ogye obagambire oti, ‘Omukama Ruhanga niwe alikugamba.’

⁵ Balikakuhulira anga balikanga kukuhulira (orwo bali ihanga elishengi) baramanya okwo baina omurangi.

⁶ Kandi iwe mwana w'omuntu, otakubatina. N'ebyo baragamba otakubitina, n'orwo oli omu rukwatango n'amahwa, oshuntamiire obumina. Ebyo baragamba otakubitina. Kandi batakuleba okahahanwa, orw'okuba ihanga elishengi.

⁷ Balikahulira anga balikanga kuhulira, ebyo ndikukugambira obibagambire; orw'okuba ihanga ly'abashengi.

⁸ “Kyonkai iwe, mwana w'omuntu, hulira ebyo ndikukugambira. Otakuba mushengi nka ihanga elyo. Oyashamure akanwa olye ebyo ndikwija kukuha.”

⁹ Kanagiire kugira nti, leba omukono gunyolekeire, gukwete ekitabo ekihandikirwe.

¹⁰ Omukono ogwo gunzingurulira ekitabo ekyo, kihandikire omu maisho n'enyuma, ebigambo by'okuchura n'okutongya n'okuganya.