Ezaburi 94 - Ebibulia 2001

Omukama ayeholera omugorogoki

¹ Waitu Mukama, Ruhanga abonabonyia, iwe Ruhanga abonabonyia, yoleka okwo obayo, singa oyehoroze.

² Waitu muramuzi w'ensi imuka; obonabonyie ab'eikuru!

³ Waitu Mukama, ababi baliberahai, ababi baliberahai n'okweshalingya?

⁴ Abafakare bona nibeshalingya, bali omu kujumangana.

⁵ Nibashasa abantu bawe, waitu Mukama, baliho nibabatuntuza.

⁶ Nibaita entumbwakazi n'omwizi, nibakindura n'enfuuzi.

⁷ Nibagamba ngu Omukama tabona; Ruhanga wa Yakobo tabyetaireho.

⁸ Inywe abalenga bwoli mushobokerwe! Isi inywe bafera amagezi muligagira maki?

⁹ Ayatuhaire amatwi tahulira? Isi kayatuhaire amaisho wenene tabona?

¹⁰ Ogu abonabonyia amahanga, muti alekeire? Wenene aha abantu amagezi;

¹¹ Omukama namanya ebitekelezo by'abantu, okwo bilikushusha orwoya kushai.

¹² Waitu Mukama, muberwa omuntu ow'okanga, ow'oyegesa Amateka gawe;

¹³ oba nomwendera emilembe orwo enaku zilija, ababi bakagya omu nyanga.

¹⁴ Kuba Omukama talinagirana ihangalye; abantube talibahwamu.

¹⁵ Ehaki eligarukira omugorogoki, n'ab'emitima egorogokire bona balimanya amazima.

¹⁶ N'ohai aliimuka akandwanisiza ababi? N'ohai alimuka akandwanisiza abafakare?

¹⁷ K'Omukama atakunjunire, aha nakuba ndatwire omu nsi y'abafire.

¹⁸ Kanabaire nagira nti, “Natelera,” waitu Mukama, ekisha kyawe kyandamira.

¹⁹ Orwo omutima gwange gukanyilirwa ebitekelezo, iwe oba n'iwe ogumaramara.

²⁰ Abaramuzi ababi tobategenyeza, orwo batakoza mazima.

²¹ Bema hamoi kwita omugorogoki, nyakatetere bamuramura kumwita.

²² Kyonkai Omukama ambeleire boma, Ruhanga wange ambeleire rwazi rw'obuhungiro bwange.

²³ Alibabonabonyia abature amafu gabo, abaite bazire entambara zabo; Omukama Ruhanga waitu alibamaliraho kimoi.