Ezaburi 91 - Ebibulia 2001

Ruhanga omwendabantu

¹ Omuntu atura alinzirwe Rukirabyona, aikara omu mikono ya Rushoborabyona.

² Aligambira Omukama ati, “Ruhanga wange, obwirukiro bwange; boma yange, n'iwe nyesiga.”

³ Kuba alikwihura omu mutego gw'omutegi, akuhungye n'aha ndwara nyamwita.

⁴ Alikutanturulira emikonoye, ohungire omuli yonene; obwesigwabwe bulikubera ngabo bukulinde.

⁵ Tolitinisibwa itumbi, anga mwambi ogurashwa nyemishana,

⁶ handiki endwara eshoita omu mwilima, nangu n'orufu oruhurutura abantu omw'ihangwe.

⁷ Orukumi n'orwo bakugwa aha rubaju rwawe, n'akakumi aha bulyo bwawe, iwe rufu talikugoba.

⁸ Olyebonera n'amaisho gawe, obone okwo ababi barongorwa.

⁹ Orwo oyekwete Omukama, akaba bwirukiro bwawe, Rukirabyona akaba buturo bwawe;

¹⁰ toligwerwa kabi kona kona, taliho kibundo kilija mwawe.

¹¹ Araragira abamalaikabe bakulinde, bakulinde hona hona mbali orakagyaga.

¹² Barakushuturaga omu mikono yabo, otalija okasitara aha ibare.

¹³ Olilibatilira entare n'empili, ekyana ky'entare n'enjoka obikandagilire.

¹⁴ Orwo alikungonza akanyekwata, ndimurokora; ndimulinda, aha rw'okuba namanya.

¹⁵ K'arambilikiraga ndamuhororaga; ndabaga nawe omu nakuze, murokore mara muhe ekitinwa.

¹⁶ Ndimuha oburora burai, akure abondabonde, mara nshube murokore.