Ezaburi 9 - Ebibulia 2001

Kusimira Ruhanga amazimage

¹ Nsime Omukama n'omutima gwange gwona; nyebuge ebigiro byawe eby'okutangaza.

² Nshemelerwe nkushandukire, nsingiize eibara lyawe, waitu Rukirabyona.

³ Enshonga ababisha bange bashubireyo, basitara, bachweka omu businge bwawe.

⁴ Okuba ondwaniliire, osingiire aha nketo waramura eiramu ly'amazima.

⁵ Okangire amahanga, wasilikya abanyarwango; wabachwa eira lyona.

⁶ Omubisha ahoireho yasilika asilikire; ebigo byabo obisindwire; tibakiijukwa na kati.

⁷ Kyonkai Omukama asingiire aha nketo eirai lyona, aikaliire enketoye kuramura emishango;

⁸ ensi agiramuza amazima, amahanga agaramura obuzira kigonzi.

⁹ Omukama n'iwe boma y'abanaku, boma omu biro by'amatangwa.

¹⁰ Bona abakumanya bakwesiga, kuba iwe, waitu Mukama, abakuhiga tobanagirana.

¹¹ Singiza Omukama asingiire Sioni! Gamba omu mahanga ebikorwabye.

¹² Ruhanga aijuka abashashe; tayebwa kutaka kwabo, kandi abonabonyia abaisi.

¹³ Ngilira ekisha, Mukama, leba okwo abannoba balikunshasa, iwe anyihya aha munwa gw'enyanga,

¹⁴ mbone kukwebuga, kandi omu maisho g'abantu ba Sioni, mbone kukushandukira orwo wandokora.

¹⁵ Amahanga gatontobeire omu kiina ekyo galimire; amaguru gabo gakwatira omu kitimba ekyo babaire bategire bashelekire.

¹⁶ Omukama yayeyoleka omu kuramura eiramu ly'amazima; abanyarwango bagwa omu rwango rwabo.

¹⁷ Abanyarwango bagye Sheoli, nigo mahanga gona agebwa Ruhanga.

¹⁸ Abakene buli mwanya tibalyebeka, n'abanaku eirai lyona tibalilekera kushubira.

¹⁹ Shaya, waitu Mukama, Omuntu atakushagya mani; amahanga gasingwe omu mabona gawe!

²⁰ Ogatinise, waitu Mukama! Bamanye okwo bali bantu kushai!