Ezaburi 88 - Ebibulia 2001

Mukama otannaga

¹ Waitu Mukama, Ruhanga wange, nyemishana ntagira iwe k'onjuna; omu kiro nintakira omu mabona gawe.

² Singa enshara zange zigobe ahali iwe, bahulire okutaka kwange!

³ Omwoyo gwange gwina enaku zingi, ndaliire kugya Sheoli.

⁴ Nabalirainwe n'abalikusongoka Sheoli. Ndi muntu atagira mani.

⁵ Inye nabalirainwe omu bafu, ndi nk'owo baisire agoroize omu nyanga, ndi nk'ab'otakijuka n'akake, ahakuba wabahoiremu.

⁶ Wannaga Sheoli okuzimu, mbali hali omwilima lindindi.

⁷ Ekiniga kyawe kintekeleire, amayengo gawe gona gammira.

⁸ Batahi bange wabaha okunyenyinya; wampindura kishekurutu ahali bonene. Wankomerana omunda, tinakwiruka.

⁹ Amaisho gange gahobeire, ninzira obujune. Waitu Mukama, buli kiro nintaga ahali iwe; ninkwanjalira emikono yange.

¹⁰ Abafu tobakolera bitangazo; kandi abafire tibakuhimbuka kukusingiza.

¹¹ Ekisha kyawe tikirangwa mu nyanga, nangu n'obwesigwa bwawe omuli Abadoni.

¹² Ebitangazo byawe tibimanyika mu mwilima, n'oburungi bwawe tibwijukwa mu nsi y'abayebekire.

¹³ Kyonkai inye, waitu Mukama, nkutakira; bwankya enshara zange nizija omu mabona gawe.

¹⁴ Waitu Mukama, kiki kunnagirana? Okunyesheleka kwaki?

¹⁵ Kwema buto kuhika mwaha mba mushashe, ndembekeleire aha rufu; ninkutina muno, tinyina bugyo.

¹⁶ Ekiniga kyawe kyanyita, wannigalira kubi wansilikya.

¹⁷ Ekiniga kyawe nikisiiba kintangire, nikintangatanga embaju zona nk'omutunga.

¹⁸ Munywanyi wange na mutahi wange wabaha okunyenyinya; batahi bange bali omu mwilima.