Ezaburi 83 - Ebibulia 2001

Rukirabyona mutwazi w'ensi yona

¹ Waitu Ruhanga leka kwesiza, leka kuchecheka okata omu ngoma, waitu Ruhanga!

² Ahakuba ababisha bawe bayagarara; abakunoba batagaraza emitwe.

³ Nibanamira abantu bawe; nibategeka kwita abali omu mikono yawe.

⁴ Nibagamba bati, “Mwije tubamareho eihanga lyona; eiranga lya Isiraeli lichweke!”

⁵ Kabalikutegeka bagamba kimoi, nibarahira kukushenga.

⁶ Bonene abo Baedomu, Baishimaeli, Bamoabu n'Abahagari abarug'aha nibatur'aha,

⁷ hamoi n'Abagebali, Abamoni, n'Abaamaleki, Abafilisiti n'abataka ba Tiro;

⁸ Abasiria kwakwo bemire nabo; nibahwera muno baijukuru ba Loti.

⁹ Obakore okwo wakozire Abamidiani ekya Sisera na Yabini aha Mwiga gwa Kishoni,

¹⁰ abasilikiire Endori, bakashusha amashai omw'itaka.

¹¹ Abarangira babo babe nka Orebu na Zeebu, abatwazi abakuru babo bona obasinge nka Zeba na Zalumuna,

¹² ababaire bebugire bati, “Ensi ya Ruhanga tugilye.”

¹³ Waitu Ruhanga wange obakukumbe, nk'okwo akazimu kakukumba omutakuro, batuntumuke nk'okwo omushunga gutuntumurwa omuyaga.

¹⁴ Nk'okwo omuliro gwokya ekibira, gukokya amabanga gakamengetuka,

¹⁵ obe nikwo obabingisa omuyaga, mara obahukuze akazimu!

¹⁶ Obakwase enshoni, waitu Mukama, nirwo balikuhiga.

¹⁷ Bakwatwe enshoni, bahahanwe emitima ebiro byona, enshoni zibaite.

¹⁸ Bamanye okwo iwe wenkai, ayetwa Mukama, oba Rukirabyona, n'iwe mutwazi w'ensi yona.