Ezaburi 73 - Ebibulia 2001

EKITABO KYA KASHATU ( Zab 73–89 ) Waitu mani gange tinkute

¹ Mazima Ruhanga agilira abagorogoki ekisha, nibo balinya abagira emitima elikwera.

² Inye nkaba ndaliire kushuburugukwa, obwesige bwange bukaba bukwatiliire.

³ Abanyaikuru nabachubiraga, kanabonaga eby'ababi nibigenduka.

⁴ Nobona bonene tibarwara, baikara n'amani bagomokire.

⁵ Tibashasha nka bantu bandi, ebiyengo ebikwata banu tibibakwata.

⁶ Eikuru balijwara nk'omukofu; obukutu babujwara nk'omwendo.

⁷ Bagamba kubi, emitima yabo etekeleza ebibi byonkai.

⁸ Bajuma abantu, babageya; eikuru nilibaita, bahiga okwo barabonabonyia banu.

⁹ Barogota ahali Ruhanga omw'igurulye, omu nsi bajarabisa abantu eisinini.

¹⁰ Abantu bahinduka babahondera, ebyo balikugamba tibalikubibonamu kabi.

¹¹ Bagamba bati, “Ruhanga arabimanya atai? Rukirabyona amanyaki?”

¹² Leba, ababi bab'aba; baikara omu kagaranjuko, batunga baganagana.

¹³ Nikwo kugir'oti okwelinda kwange n'okutafakara bya bushai?

¹⁴ Ekiro kyona enaku zibona inye, buli bwankya zinyimukiramu.

¹⁵ Kanakugambire ebyab'ebi, mpaho nakubaire ntali mwana wawe kwo.

¹⁶ Kanalengire kwekonja ekigambo eki, kyambera gango.

¹⁷ Kuhika orwo nagiire omuli Rwensinga yawe. Ababi nirwo namanyire ebilibaizira.

¹⁸ Obanagire omu butelezi, wamara wabasilikya.

¹⁹ Aho honkai basilikire, bahwaho kibandagara, enaku zabalya.

²⁰ Nibashusha ekiroto orwo omuntu aimuka, k'oimuka obona okwo ekiroto kyakubeiya.

²¹ Orwo ebitekelezo byankanyireho, nagira n'obujune.

²² Nkaba ndi mufera atamanya nk'ekigunju; nkaba ntakushobokeirwe.

²³ Mbwenu tinkute; n'iwe mani gange.

²⁴ N'iwe muhanuzi wange ampabura, ahanyuma olintendeka.

²⁵ Omw'iguru tingirayo ondijo shana iwe, omu nsi omu talimu kyondikwenda shana iwe.

²⁶ Obubili nakujegara, mburwa amani, kyonkai Ruhanga n'iwe mani gange, n'iwe mugabo gwange eirai lyona.

²⁷ Manya leba, abatakuliho balichweka; abatakugilira bwesigwa olibasilikya.

²⁸ Kyonkai inye tinyinayo kindi, kakutali kwekwata Ruhanga; Ruhanga Omukama, inye n'iwe aba bwirukiro bwange, ebyo ankoleire ndabyebugaga.