Ezaburi 44 - Ebibulia 2001

Ruhanga omujuna banje

¹ Waitu Ruhanga, twayehulilira n'amatwi gaitu, batat'enkurw'ichwe bakatugambira ebikorwa ebyo wakozire omu makiro gabo, amakiro ag'eirai;

² okwo amahanga wagabingisizemu obushobora bwawe, kyonkai batat'enkurw'ichwe wabataho; amahanga wagabonesa enaku, kyonkai bonene wabatunga obwikarage.

³ Aha rw'okuba ti mbanda yabo eyabashoboize kusinga ensi, handiki bushobora bwabo kubakora kusinga endashana, shana obushobora bwawe n'amani gawe, n'okuba hamoi nabo kwawe; aha rw'enshonga wabashemelerwaga.

⁴ N'iwe oba Mukama wange kandi Ruhanga wange, n'iwe wahaga Yakobo okusinga endashana.

⁵ N'iwe otushoboza kutera omubisha waitu ahansi; omu mani gawe omubisha waitu tumujungilira omw'itaka.

⁶ Nobona inye tindikwesiga buta bwange, anga kugira nti mbanda yange yakundokora.

⁷ Iwe watukiza aha mubisha, abatunoba wababurabuza.

⁸ Ruhanga n'iwe twebuga obutosha, eibara lyawe tulilisima eirai lyona.

⁹ Nawe kandi mbwenu watunaga twasingwa, amahe gaitu tokigemamu.

¹⁰ Watuha okwiruka omubisha, omubisha yatunyaga.

¹¹ Watuleka kabatwita nk'entaama, watunaganaga omu mahanga.

¹² Eihanga lyawe waliguza omu mahera gake muno, tiwabaguza mw'iramu lihango.

¹³ Watunagira amahanga agatwataine kutujamya, abatuzingoire nibatushekelera nibatugaya.

¹⁴ Watugahisa omu mahanga, amahanga nigaturerura.

¹⁵ Wankwasa enshoni omushana gwona, enshoni zambunda aha maisho,

¹⁶ orwo abasheki balikunshekelera, kabalikuhulira eby'ababisha bange balikugamba.

¹⁷ Ezi naku zona zitubunzire, n'orwo tutakwebirwe, anga kutaba besigwa aha ndagano yawe.

¹⁸ Emitima yaitu teshubire nyuma, handiki bigere byaitu kuruga aha muhanda gwawe;

¹⁹ kandi iwe watunaga omu mishega, watuteka omu mwilima elindindi.

²⁰ Katwakulekeire kufukamira Ruhanga waitu, tukashoma enshara ahali ruhanga ow'aheru,

²¹ manya rwona ekyo wakukimanyire, manya iwe omanya enama z'emitima yaitu.

²² Ego, nibatwita obutosha, nibatutura iwe, twashusire entama z'okubagwa.

²³ Sisimuka! Ekyakunagiza kiki waitu Mukama? Sisimuka! Otatunagirana eirai lyona.

²⁴ Kiki kwesheleka? Enaku zaitu n'okushasha kwaitu byakweba?

²⁵ Tuteirwe kubi, tuli aha itaka; twasingwa, tubyamire omu chuchu.

²⁶ Imuka ija otujune! Oturokore aha rw'ekisha kyawe!