Ezaburi 18 - Ebibulia 2001

Esiimi y'omukama Daudi

¹ Ninkugonza, waitu Mukama, mani gange.

² Omukama n'iwe rwazi rwange, boma yange, Murokozi wange, Ruhanga wange, rwazi rwange, bwirukiro bwange, ngabo yange, fanfe andokora, boma yange.

³ Ntakira Omukama, ankiza aha babisha bange. Omukama ahaisilizibwe.

⁴ Emiguha ya Rufu ekantulega, engezi zankukumba kunyita;

⁵ emiguha ya Sheoli ekanzingazinga, emitego ya Rufu ekantangatanga.

⁶ Omu bushasi bwange nkatakira Omukama, nkatagira Ruhanga wange k'anjuna. Akema Rwensingaye yahulira eiraka lyange, okutaga kwange akakuhulira.

⁷ Nirwo ensi yayechuzire ekaneganega, n'emisingi y'amabanga ekajugumba, yachundwa, kuba akanigara.

⁸ Omwika gukamuchunka omu nyindo, n'omuliro gulikurabagira gwamuruga omu kanwa; yarugwamu amakara galikumengetuka omuliro.

⁹ Eiguru akalinika, lyainama; omwilima elindindi yagulibatira.

¹⁰ Yakuuba omukerubi, yaharara; yajwelemuka aha mapapa g'omuyaga.

¹¹ Akebunda omwilima, ekisiikakye aha mutwe bichwi by'enjura.

¹² Obusobwe obulikurabarabya, bwarugwamu orubare n'enshasi z'omuliro, byaguturana omu bichwi by'enjura.

¹³ Nikwo Omukama kuhinda omw'iguru, Rukirabyona yayatangura eiraka, orubare n'enshasi z'omuliro.

¹⁴ Yarasha emyambi, yabatamagya; yataishura endabyo, yabairukya.

¹⁵ Orwo wakabukire, waitu Mukama, kawamazire kunigara muno, enyato z'enyanja zazoka, emisingi y'ensi yashuruguka, orwo watulikire orwoya omu nyindo.

¹⁶ Yayema eiguru akunikiliize, yankwata, yanyihya omu nyanja engundu.

¹⁷ Akanyihura aha mubisha w'amani, yanyuguruza aha bannobaga; nobona bankizaga muno amani.

¹⁸ Bakambunda kir'ekyo naterwa enaku, kyonkai Omukama yambera buhungiro.

¹⁹ Yazinyihyamu yanteka aheyagarwire, yankiza, kuba akanshemelerwa.

²⁰ Omukama akandongora, nk'okwo oburungi bwange bwabaire buli; akandongora kuhonderana n'okwera kw'engaro zange.

²¹ Nkekomya Amateka g'Omukama, tinafakaire kusigaho Ruhanga wange.

²² Nkekomya emigenzo yona, tinataine na biragirobye.

²³ Nabaga nyamibwa ahali wenene, nayelindaga entambara.

²⁴ Aha rw'ekyo Omukama andongoleire obugorogoki bwange, nk'okwo alikubona okwera kw'engaro zange.

²⁵ Abesigwa obabera mwesigwa; omuntu nyakatetere omubera nyakatetere.

²⁶ Aha nshemere oba nshemere, akokobire omukokobera.

²⁷ Nobona orokora abetohya, kyonkai ab'eikuru obatera ahansi.

²⁸ Nikwo, onyakiza etara yange, Omukama Ruhanga wange, n'iwe ambingira omwilima.

²⁹ Nikwo, kanyina iwe eihe ninditera; orwo nyina Ruhanga wange, orukuta ninduchoka.

³⁰ Ruhanga ogu ebigirobye bigorogoki bitai! Ekigambo ky'Omukama tikichwa igambi; aba ngabo y'abamuhungiraho bona.

³¹ Ruhanga n'ohai k'atali Mukama? Rwazi n'ohai k'atali Ruhanga waitu?

³² N'iwe Ruhanga angumisa, n'iwe andinda omu rugendo.

³³ Amaguru gange yagashusa ag'enjaza, yanyemeleza aha mabanga, tinaba kantu.

³⁴ N'iwe anyegesa endashana, nkagoba aha kwinika obuta bw'omulinga.

³⁵ Mukama okambera ngabo wandokora, ogwa bulyo gwawe gwandamira, wanjuna naba mushongore.

³⁶ Wampa oburabo obweyagarwire, ebilenge byange kutelera n'akati.

³⁷ Nkaligisa omubisha wange namukwata, tinakubukire kuhika orwo bafire bakahwaho.

³⁸ Nkabatundwigura obutaimuka; nabalibatilira.

³⁹ Kuba okampa amani g'endashana, abannobaga nabasilikya.

⁴⁰ Omubisha wange okamuha okunkubukira, abannobaga nabaita nabachwa.

⁴¹ Batakira ow'okubajuna, kyonkai taliho yazokire kubarokora, batakira Omukama, kyonkai tiyabahoroire.

⁴² Nkabatera nabasasanura nk'echuchu etwarwa omuyaga; nabashaimura nk'eshabo omu kihanda.

⁴³ Okanjuna amahanga agashengi; wampa okugakulira; abo ntamanyaga baba bairu bange.

⁴⁴ Orwo bamazire kumpuliza bati bahinduka bairu bange; abanyamahanga bakangoba nibabandama.

⁴⁵ Abanyamahanga bahwa omwoyo, baruga omu boma zabo nibajugumba.

⁴⁶ Omukama asingiire, ahaisilizibwe rwazi rwange, asingizibwe Ruhanga andokora.

⁴⁷ Ruhanga ayanyeholeire, amahanga akagahindura bairu bange;

⁴⁸ ayantamwize aha mubisha wange; nikwo, okampa okugelera omubisha wange; wanyihura aha banyamwaga.

⁴⁹ Kityo, waitu Mukama, nkwebuge omu mahanga, nsingiize eibara lyawe.

⁵⁰ Enkorwamajutaye agiha okusinga kw'amani, agilira enkorwamajutaye ekisha, Daudi na baijukurube eirai lyona.