Ezaburi 148 - Ebibulia 2001

Buli kitondwa kisingize Omukama

¹ Musingize Omukama, Haleluya. Inywe ab'omw'iguru musingize Omukama; nainywe abali eiguru muno mumuhaisilize.

² Bamalaikabe inywena mumusingize, inywe mahe ga wenene inywena mumuhaisilize!

³ Izoba n'okwezi mumusingize, nainywe nyanyinyi zona zilikwaka mumuhaisilize!

⁴ Iwe iguru elya kaleire omusingize; naiwe maizi agali omw'iguru elyo!

⁵ Bisingize eibara ly'Omukama! Ahakuba wenene akahanga, byonene byatondwa.

⁶ Akabitaho kabibaho eirai n'eirai; yataho n'obuhangwa bwabyo obutaina kuhinduka.

⁷ Inywe ab'omu nsi musingize Omukama, inywe bikaaka by'enyanja n'enyanja obuziba,

⁸ omuliro n'orubare, eseluji n'oruho, n'omuyaga gw'amani oguhulira omuhangogwe!

⁹ Amabanga n'enshozi zona, emiti y'ebiraba n'emyelezi yona!

¹⁰ Enyamaishwa n'ebitunganwa byona, ebyekurura n'ebinyonyi ebiharara!

¹¹ Abakama b'ensi n'amahanga gona, abatwazi n'abebembezi bona b'ensi!

¹² Abasigazi n'abaisiki hamoi, abagurusi n'abana!

¹³ Basingize eibara ly'Omukama, ahakuba eibaralye lyonkai nilyo lisingizibwa; ekitinwakye nikishaga ensi n'eiguru.

¹⁴ Ateire eihangalye eishongore, abatakatifube bona bamusingize, nilyo ihanga lya Isiraeli elimuli haihi. Musingize Omukama, Haleluya!