Ezaburi 145 - Ebibulia 2001

Ndasingizaga Omukama

¹ Ndakuhaisiliza, Ruhanga wange, Omukama, nsingiize eibara lyawe eirai lyona.

² Nkusingize buli bwankya, mpaisilize eibara lyawe eirai n'eirai.

³ Omukama aba muhango, kandi w'okuhaisilizibwa n'amani, obukurubwe tibugambwa.

⁴ Omuzarwa ogumoi gulyebuga ebikorwa byawe omu muzarwa ogundi, guliranga ebigiro byawe eby'amani.

⁵ Ndayekonjaga oburungi bw'ekitinwa ky'obukuru bwawe, nyikare n'inyekonja ebikorwa byawe eby'okutangaza.

⁶ Abantu baligana amani g'ebikorwa byawe katangaza, nanye ngambe obukuru bwawe.

⁷ Baligambaho muno eiranga ly'ebirungi byawe enkuyanja, n'obugorogoki bwawe babwebuge.

⁸ Omukama aba w'ekisha n'obuganyizi, tanigara bwangu kandi ekisha agira kingi.

⁹ Omukama aba murungi wa bona, kandi embabazi azigilira ebitondwabye byona.

¹⁰ Mukama orasimwaga ebitondwa byawe byona, n'abali bawe nyabwawe barakusingizaga!

¹¹ Barayebugaga ekitinwa ky'engoma yawe, bagambe n'obushobora bwawe,

¹² bamanyise abantu ebikorwa byawe eby'amani, n'oburungi bw'ekitinwa ky'engoma yawe.

¹³ Engoma yawe ngoma y'eirai lyona, n'obukama bwawe tibulichweka amakiro gona. Omukama aba mwesigwa omu by'akagamba byona, n'omu by'akakora byona ekisha akigira.

¹⁴ Omukama aramira bona abaraliire kugwa, kandi aimukya bona abagwire.

¹⁵ Ebitondwa byona amaisho bigahangire iwe, obigabira ekyakulya omu kanya ako bikitegeleize.

¹⁶ Obumburura engaro zawe, oigusa buli kitondwa okwo kyaba nikyenda.

¹⁷ Omukama agira amazima omu ntwazaze zona, n'omu bigirobye byona aba mufura.

¹⁸ Omukama abakamutakira bona abali haihi, bona abamutakira nibamwesiga.

¹⁹ Abamutina bona abatunga ebyo balikwenda, kandi ahulira okutaka kwabo, mara abarokora.

²⁰ Omukama abamugonza bona abalinda, kyonkai ababi bona alibasilikya.

²¹ Akanwa kange karasingizaga Omukama, na buli muntu ahaisilize eibaralye eirai lyona.