Ezaburi 118 - Ebibulia 2001

Ekisha ky'Omukama ky'eirai lyona

¹ Inywe musiime Omukama, ahakuba murungi, ekishakye kiba ky'eirai lyona!

² Isiraeli agambe ati, “Ekishakye kiba ky'eirai lyona.”

³ Eka ya Aroni egambe eti, “Ekishakye kiba ky'eirai lyona.”

⁴ Abatina Omukama bagambe bati, “Ekishakye kiba ky'eirai lyona.”

⁵ Omu matangwa gange nkatakira Omukama; Omukama yamporora, yantunga emilembe.

⁶ Orwo nyina Omukama tindikutina, omuntu yakunkoraki inye?

⁷ Nyina Omukama alinjuna; abannoba balisingwa mbalebire, inye ebyera nibiita.

⁸ Nikigasha kwirukira Omukama, kushaga okwesiga kashoke.

⁹ Hakili kwirukira Omukama, kukira okwekwata abatwazi.

¹⁰ Amahanga gona gakanzingora, kyonkai omw'ibara ly'Omukama nabakindura!

¹¹ Bakanzingora, banzingora embaju zona; kyonkai omw'ibara ly'Omukama nabakindura!

¹² Bakanzingora nk'enjoki, bamengetuka nk'omuliro omu mahwa; kyonkai omw'ibara ly'Omukama nabakindura!

¹³ Bakanchuma n'amani nalembekelera kugwa, kyonkai Omukama yampwera.

¹⁴ Omukama n'iwe mani gange, byebugo byange, n'iwe ambeleire Murokozi.

¹⁵ Hulira akanyahwera basingiire endashana, omu mahema g'abagorogoki: “Omukono gwa bulyo gw'Omukama gumanzara;

¹⁶ omukono gwa bulyo gw'Omukama gusingizibwe, omukono gwa bulyo gw'Omukama gumanzara!”

¹⁷ Tindifa, ndirora, nyebuge ebikorwa by'Omukama.

¹⁸ Omukama ambonabonize yammaramu akajanja, kyonkai kandi yansigira oburora.

¹⁹ Ankingulira emilyango ya Rwensinga, ngirabemu ngye nsiime Omukama.

²⁰ Ogu nigwo mulyango gw'Omukama, omugorogoki n'iwe aligurabamu.

²¹ Ninkusiima, omporoire, wamara wandokora.

²² Eibare elyo abombeki bayangire, nilyo libaire ly'engundu omu pembe.

²³ Eki kikozirwe Omukama wenene; ky'okutangaza omu maisho gaitu.

²⁴ Eki nikyo kiro eky'Omukama ataireho; tushanduke tukyeshandire.

²⁵ Baturokore, waitu Mukama, nitukutagiliza!

²⁶ Abe kilimugisha alikwija omw'ibara ly'Omukama! Twemire Rwensinga y'Omukama nitukusingiza.

²⁷ Omukama n'iwe Ruhanga, mara yatukyanura, mukwate amatagi mutere enjuru, mugobe ahali elutare mugizingore!

²⁸ Oba Ruhanga wange, kankusiime; Ruhanga wange aba iwe, kankusingize.

²⁹ Musime Omukama kuba aba murungi; ekishakye kiba ky'eirai lyona.