Ezaburi 105 - Ebibulia 2001

Omukama asingizibwe

¹ Musime Omukama, murangane eibaralye, ebikorwabye mubigambe omu mahanga!

² Mumuhoyere, mumuhoyere ezaburi, murangane ebikorwabye eby'okutangaza!

³ Mwebuge eibaralye elitakatifu; emitima y'abamuhiga eyeshande!

⁴ Muhige Omukama n'obushoborabwe, mwitanire okuguma omu mabonage obutosha.

⁵ Mwijuke ebitangazobye eby'akozire, eby'amaani eby'akozire n'emishango eyo aramwire,

⁶ inywe ruzaro rwa Aburahamu omwiruwe, batabani ba Yakobo, endonkwaze!

⁷ Wenene n'iwe Mukama Ruhanga waitu; n'iwe muramuzi w'ensi yona.

⁸ Naijuka endaganoye eirai lyona, omu mizarwa rukumi naijuka ekigambo ekyo yahangire,

⁹ endagano eyo yaragaine na Aburahamu, ekinahirokye ekyo yanahiliire Isaka,

¹⁰ yamara yakishubiramu Yakobo: Kyaba kiragiro, ahali Isiraeli kyaba ndagano ey'eirai lyona;

¹¹ nagamba, ati, “Ndikuha ensi ya Kanaani, omugabo gwanyu gw'obusika.”

¹² Orwo babaire bakyali bake, bakyali bajege mara baizi omu nsi egyo,

¹³ nibajenjera nibaruga ihanga eli nibagya ihanga lindi, nibaruga bukam'obu nibagya bukama bundi,

¹⁴ tiyalekire muntu n'omoi kubabonesa naku; akataisa abakama okubashasa,

¹⁵ yagamba ati, “Mutakukoraho nkorwamajuta zange, abarangi bange mutabakora kubi!”

¹⁶ Orwo yateize ensi eifa, akahenda omuguma gwabo, nikyo kyakulya;

¹⁷ yayebembeza omuntu omu maisho gabo, n'iwe Yozefu, ayaguzibwe kuba mwiru.

¹⁸ Bagya bamukoma empingo omu maguru, enkomo y'ekyoma yamugya omu ngoto;

¹⁹ kuhika orwo ebyo yagambire byahikire, ekigambo ky'Omukama kyamubera bujulizi.

²⁰ Aho omukama yaragira kabamutaishura, omutwazi w'eihanga yamubohorora.

²¹ Yamuhindura mukama omwa wenene, kandi mugelezi w'eitungalye lyona.

²² Yamuha okwegesa abaramata okwo alikwenda, n'abahanuzibe kubegesa eby'obumanyi.

²³ Aho Isiraeli aija Misiri; Yakobo yafurukira omu nsi ya Hamu.

²⁴ Omukama yaha abantube oruzaro rungi muno, yabatunga amani bagakiza ababisha babo.

²⁵ Yahindura emitima y'Abamisiri banoba abantube, babonesa abairube enaku.

²⁶ Yatuma Musa omwiruwe, na Aroni owo yashangirwe aronzire.

²⁷ Bakora obubonero omu maisho gabo, n'eby'amani omu nsi ya Hamu.

²⁸ Yaleta omwilima gwabamba ensi; kuba bakajemera ebigambobye.

²⁹ Amaizi gabo yagahindura bwamba, enfuru zabo yaziita.

³⁰ Ebikere byaijura ensi yabo, nangu n'omu biyumba by'abakama babo.

³¹ Yagamba, yaijwa emijumbi y'enshwera, n'enda zamaraho ensi yabo yona.

³² Aha mwanya gw'enjura yabateza orubare, endabyo zarabarabya omu nsi yona.

³³ Emizabibu yabo n'emitini yagiita, emiti omu nsi yabo yagihendahenda.

³⁴ Yagamba, lyaleta enzige, n'ebyana by'enzige obutabarwa.

³⁵ Byagya byalya ebimera omu nsi yabo, byalya n'ebiraba byona omu misiri.

³⁶ Emizigaijo yona omu nsi yabo yagiita, ebiraba bya mbere by'amaani gabo.

³⁷ Ahanyuma yaihya Isiraeli omu nsi egyo, batwara efeza n'ezahabu; enganda zabo zona zikaba zina amani.

³⁸ Ensi ya Misiri eshemelerwa orwo baturukire, aha rw'okuba bakaba bagikangire muno.

³⁹ Yatanturura ekichwi kyabashweka, yataho omuliro gwabakiza omu kiro.

⁴⁰ Bagabisa, yabaletera entitiri, yabaha n'omukate gungi gw'omw'iguru.

⁴¹ Yayata orwazi, amaizi gafumuka; gagera omw'irungu oti mwiga.

⁴² Kuba akaijuka ekiraganokye ekitakatifu, na Aburahamu omwiruwe.

⁴³ Kutyo yaba nikwo atwara abantube nibeshanda, endondwaze zagenda nizihoya.

⁴⁴ Yabatunga ensi z'amahanga, balya eby'amahanga gahendekeire,

⁴⁵ babone kwekomya ebiragirobye, bakwate n'Amatekage. Musingize Omukama Haleluya!