Ezaburi 103 - Ebibulia 2001

Singiza Omukama mwoyo gwange

¹ Singiza Omukama, iwe mwoyo gwange, inyena okwo ndi nsingiize eibaralye,

² Singiza Omukama, iwe mwoyo gwange, otayebwa matungwage,

³ wenene ogwo akugarulira amafu gawe gona, akakukiza endwara zawe zona;

⁴ akakutamuza rufu, akakujweka ekisha n'obuganyizi,

⁵ akakwigusa ebirongoro oburora bwawe bwona, k'oikara oli musigazi n'amani nka malere.

⁶ Ababonesibwa enaku bona Omukama abakolera ebigorogokire n'amazima.

⁷ Emihandaye akagimanyisa Musa, ebikorwabye yabimanyisa Isiraeli.

⁸ Omukama agira obuganyizi n'ekisha, agira ekisha kandi ti mwangu kunigara.

⁹ Talikwija kwikara arwaine, anga kunigalira kimoi eirai lyona.

¹⁰ Talikutugira kuhondera mafu gaitu, handiki kutubonabonyia nk'okwo entambara zaitu zili.

¹¹ Nk'okwo eiguru liliraine harai n'ensi, nikwo n'ekishakye kili kingi aha bamutina.

¹² Nk'okwo oburugaizoba buli harai n'obugwaizoba, nikwo n'amafu gaitu alikuganaga harai.

¹³ Nk'okwo ishemuntu aganyibwa abaanabe, nikwo Omukama aganyibwa abamutina.

¹⁴ Ahakuba natumanya emitonderwe, naijuka okwo tuli itaka.

¹⁵ Oburora bw'omuntu nibushushana n'obunyasi; ageija nk'ekimuli ky'omu kikamba;

¹⁶ kyonkai orwo omuyaga gukirabaho tikikiliho, na mbali kyaba kili kiba kitakimanyikaho.

¹⁷ Ekisha ky'Omukama kiguma aha bamutina, na baijukuru babo abakolera ebirungi;

¹⁸ nibo balinya abekomya endaganoye, n'okukwata emihangoye.

¹⁹ Omukama enketoye akagita omw'iguru, engomaye niyo eshaga engoma zona.

²⁰ Musingize Omukama inywe bamalaikabe, inywe ab'amani abahulira ekigambokye, mukahulira ebyo alikugamba!

²¹ Musingize Omukama, inywe mahe ga wenene gona, inywe bakozibe abamuhulira!

²² Eby'akakora byona bisingize Omukama, na hona mbali obukamabwe butaire omukono. Singiza Omukama iwe mwoyo gwange!