Emigani 8 - Ebibulia 2001

Okusiima obumanyi

¹ Hulira Bumanyi ayesire, hulira Magezi atungamize eiraka!

² Ayemire aha mabanga eiguru haihi n'omuhanda, ayemeleire aha mihanda etaana.

³ Ali aha butahiro bw'ekigo, ayemire aha bihigi nayeta ati,

⁴ “Nyesire inywe bantu, abantu nibo ndikweta.

⁵ Inywe abataina magezi mwege obumanyi, muhulilize inywe bafera.

⁶ Muhulire mbagambire eby'enshonga, mbatulire eby'amazima,

⁷ kuba ninyija kugamba amazima, eminwa eyange ezira okugamba ebishuba.

⁸ Ebyo ndikugamba byona by'obugorogoki, tibilimu kigambo na kimoi ekikiikakiire anga ekikiikamire.

⁹ Byona by'enshonga aha munyamagezi, mara by'amazima ahali balinya abaina obumanyi.

¹⁰ Ebyo ndikwegesa mube nibyo mukwata, efeza mugileke, muhige obumanyi kushaga okuhiga ezahabu nungi.

¹¹ Obumanyi burungi kukira amabare g'eiguzi, kandi ebyo mwenda byona taliho byakwigana na bumanyi.

¹² Inye Bumanyi, ntura omu bwegendeleza, kandi nyina amagezi n'obugezi.

¹³ Okutina Omukama nikwo kutamirwa muno ekili kibi. Eikuru, eisitu, okukora kubi n'efumoro ya katozi, ebyo nibyo ntenda n'akake.

¹⁴ Entegeka n'obumanyi nyakabara bigirwa inye, ngira obugezi, ngira amani.

¹⁵ Njuna abakama omu kutwara kwabo, nirwo abatwazi bataho emiku ey'amazima.

¹⁶ Njuna abami omu kutwara kwabo, n'abagavana bona abatwara ensi bajunwa inye.

¹⁷ Ngonza abangonza, kandi abampigisa obwegendeleza bambona.

¹⁸ Ekitinwa n'eitunga bigirwa inye, ngira eitunga kamaanya n'egoshoko.

¹⁹ Ebiruga omuli inye nibikira ezahabu, nangu ezahabu enchenkure, nibishaga n'efeza kaliza.

²⁰ Inye ebyo nkora biba by'obugorogoki, ebiina amazima nibyo nkora,

²¹ ntungisa abangonza, buhanika zabo nzijuza.

²² Omu byo Omukama yakozire akabanza kutonda inye, omu byoyakozire obutwe n'inye yakozire mbere.

²³ Nkabaho karai aka karai, aha mbandizo yonene ensi etakabaireho.

²⁴ Nkabaho enyanja zitakabaireho, n'enchuro ezitoma zitakagiireho.

²⁵ Amabanga n'enshozi bitakatonzirwe, inye nazairwe.

²⁶ Ruhanga atakatonzire nsi na marungu gayo, nangu n'eitaka ely'okwijura ekiganja, inye ndiho.

²⁷ Orwo yatonzire eiguru nkaba ndiho, n'enyanja yona kugitonda, ndiho.

²⁸ Kayagiire kutaho ebichwi eiguru, inye ndiho, n'enyanja kutabuka, inye ndiho,

²⁹ nangu n'orwo yagiragiire mbali eragarukira, inye ndiho. Ensi nayo kayagiire kugitonda nkashangwaho.

³⁰ Namwikaraga aha rubaju okw'obona omwana muto, nabaga byerabye ebya buli kiro, kandi nanye nashemelerwaga okwikara nawe buli kanya.

³¹ Nashemelerwaga n'ensiye elikuturwamu abantu, n'abantu abo banshemeleraga.

³² Mbwenu baana bange mumpulilize, baberwa abaliguma omu migilire yange.

³³ Ebyo mulikwegesibwa mutabijajaaraho, mubihulire mugire obumanyi.

³⁴ Muberwa omuntu ampuliliza, muberwa aikara buli kiro omwange aha bihigi, n'aha nyigi zange alinzire.

³⁵ Kaishe muntu ambona abona oburora, ashuba aba mushongore aha Mukama.

³⁶ Kyonkai ataina inye ogwo ayehutaza, abannoba bagonza rufu.”