Emigani 7 - Ebibulia 2001

¹ Mwana wange, ebigambo byange obikwate, kandi ebyo ndikukuragira obyekwate.

² Ebyo ndikukuragira obyekwate nirwo olirora, ebyo ndikukwegesa obikwatege nk'emboni y'eliisho.

³ Obyekome aha byara by'emikono, obihandike aha mutima gwawe.

⁴ Obumanyi obubone nka munyanyoko, kandi amagezi ogete munywanyi wawe fanfe.

⁵ Obumanyi n'amagezi bikukize aha mukazi enjanga, n'aha mumalaya ow'akalimi.

Omumalaya

⁶ Nkema omwange nalinguliza omw'idirisha,

⁷ omu basigazi abafera, nabonamu omufera alikweshusha.

⁸ Kayabaire ali omu mbarabara nagenda, enju y'omumalaya yagiraba aha pembe, agondize kugya omw'omukazi ogwo.

⁹ Bukaba buli bwaigoro aha kalemba bazana, rukaba rwaija kushwilima.

¹⁰ Leba omukazi ogwo namutanganwa, ajwete nk'omumalaya, aina n'obugobya aha mutima.

¹¹ Mukazi omuhwanshoni, natambuka nayeyenda, amaguru age tigaikara mu nju.

¹² Orundi ali omu mbarabara orundi ali omu katare, nategera buli kekubo k'omuhanda.

¹³ Kayaboine omusigazi ogwo, yamugwamu yamunywegera, yamara yamugambira obuzira nshoni aha maisho ati,

¹⁴ “Mbaire nindagirwa kugira ebitambo, mbwenu kir'eki ebyo naragaine nabigira.

¹⁵ Kityo mbwenu naija ninkuhiga, nakuhigisa orushusho mara nakubona.

¹⁶ Ekitanda kyange nakyazire, nakyaraho emyendo y'erangi eya Misiri,

¹⁷ nakihembera emigaju elikutamirana mira, eudi n'omudarasini.

¹⁸ Ija turare hamoi tukeise obwire, tushemelerwangane.

¹⁹ Aha rw'okuba ibanye talimu, azindukire harai.

²⁰ Agenzire n'omufuko gw'empiya, aragaruka okwezi kwabaire ekimatiro.”

²¹ Akamubeiyabeiyesa obugambo obulikunura, yamutwaza akalimi karungi.

²² Aho n'aho omusigazi amuhondera, okw'obona ente elikugya kubagwa, anga akasa akakwetwe omutego gukakatulega,

²³ omwambi gukalemwa gukakatundura amara. Omusigazi yashusha enyonyi eyenaga omu mutego, talikumanya okwo ekyo kilikwija kumwisa.

²⁴ Mbwenu baana bange mumpulilize, muhulilize ebyo ndikugamba.

²⁵ Emitima yanyu eleke kurongotokera eby'omukazi ogwo alikukora, muleke kujanga nawe.

²⁶ Kuba wenene yagwisize abantu bangi, abo yaisize babaire ihe lihango.

²⁷ Enjuye muhanda ogugya Sheoli, muhanda gutwara omwa rufu.