Emigani 6 - Ebibulia 2001

Emihano endijo

¹ “Mwana wange k'oraba oyesimbiire mutahi wawe, anga k'oraba oteleireho ow'aheru omusimbo,

² ahanyuma okashanga ebyo wagambire bikunagire omu mutego okwatiirwe omu bigambo byawe,

³ aho mwana wange okore oti, oyerokore, aha rw'okuba wagiire omu mikono ya mutahi wawe, oyanguhe ogende oyetohye ahali mutahi wawe ogwo.

⁴ Otakunda kunagira, anga kusombera,

⁵ oyerokore nk'ensa neiruka omuhigi, okwo ekinyonyi kisiga akitegire.”

Omuze gw'obunafu

⁶ Iwe munafu, yegera aha mushwa, olebe ebyo gukora, oyege.

⁷ Gukora gutaina mukama, mukuru anga mutwazi,

⁸ gutekateka ekyakulya kyagwo omu kyanda, n'omw'igesha gushombokya ebyo guralya.

⁹ Iwe munafu, oraikaraho obyamire kugoba maki? Orasisimukali kuruga omu turo?

¹⁰ Kanagireho kake, kansombeho, kambyameho nyikye,

¹¹ aho obunaku burakwizira okwo bwizira enyenjezi, n'obworo bukukwate okw'obona omwisherukare.

Omunyarwango

¹² Omuntu omunyarwango ataina mugasho, agenda nagamba ebya katozi,

¹³ akomakomya amaisho, atera amaguru ahansi, atunga abantu orukumu.

¹⁴ Omutima gubi gwa wenene gumukoza kubi, aikara nasimanganisa abantu emitwe,

¹⁵ aha rw'ekyo orushengo rulimugwera kibandagara, ahendahendeke aho n'aho mara talikira.

Ebyo Omukama atamwa

¹⁶ Habaho ebintu mukaga ebyo Omukama atamwa, nangu n'omu bwa wenene amahano gaba mushanju.

¹⁷ Eituli, ebishuba, okwita abataina ntambara.

¹⁸ Omutima gw'orwango ogutekeleza kukora kubi, amaguru agarahuka kukora ebibi,

¹⁹ omujulizi w'ebishuba agamba ebishuba byonka n'omuntu atejanyia abarumuna emitwe.

²⁰ Mwana wange, omuhango gwa sho ogukwate, kandi ebyo nyoko akwegesa obigumeho.

²¹ Buli kanya bikwikare aha mutima, obyekome n'omu ngoto.

²² Ebyo bakwegesa ebyo birakuhaburaga omu rugendo, bikulinde orwo orabaga obyamire. Kandi orwo orasisimukaga niyo erabaga fumoro yawe.

²³ Aha rw'okuba omuhango gushusha etara, n'ekyo wayegesibwa kiba kitangara. Emihano niyo ekwoleka okwo orarora,

²⁴ ekuha okwelinda omukazi omubi, ekulinda aha kalimi kalikutelera ak'omukazi enjanga.

²⁵ Omukazi murungi ogwo otamugahira aha mutima, kyonkai otamyora maisho ekyo kikakunaga.

²⁶ Omumalaya ashashurwa omukate gumoi, kyonkai wenene ogwo omukazi ensiyani ashoitera omushaija amwita bwita.

²⁷ Omuntu yakwekwatira omuliro omu kifuba emyendoye etahiire?

²⁸ Anga arabe aha makara g'omuliro atahiire maguru?

²⁹ Nikyo kimoi n'omuntu ashemera na muk'omushaija. Kaishemuntu agonza muk'omushaija taliburwa kibonabonyio.

³⁰ K'omushuma arumwa enjara akaiba akantu akakalya, abantu tibamugaya?

³¹ Mara orwo yakwatwa, ekyo yaiba akiliha emirundi mushanju, ataho ebye byona ebili omu njuye.

³² Omuntu asiyana aba ataina magezi, omuntu kusiyana aba nayeita.

³³ Ebyo aihyaho, gaba mahuta n'enshoni, mara ekihemukye ekyo tikimurugaho.

³⁴ Kuba ekiisho kigiza omuntu ekiniga, kandi orwo alikwehoroza taganyira.

³⁵ Takunda kuhongerwa, n'orwo wakumuha bingi bitai tagwelera.