Emigani 4 - Ebibulia 2001

Amagoba g'obumanyi

¹ Baana bange muhulire ebyo isheinywe alikubegesa.

² Kuba emiku eyo ndikubaha mirungi, ebyo ndikubegesa mutabinaga.

³ Orwo nabaire nkyali muto, ndi mwana mumoi ahali tata na mawe,

⁴ tata akanyegesa mara yangambira ati, “Ebigambo byange obyekwate, ebyo ndikukuragira obyekomye orore,

⁵ ebyo ndikugamba bugamba otabyebwa, anga kubishaima. Ogire obumanyi, obe muntu w'obumanyi ogire amagezi.

⁶ Obumanyi otabujajaaraho bukulinde, obugonze, burakwemera.

⁷ Entandikiro y'obumanyi niy'egi. Obe muntu w'obumanyi, eky'orakora kyona kyona, okikoze obumanyi.

⁸ Obumanyi obwesige muno bwije bukutungike, obubumbatire bwije bukuhaise ekitinwa.

⁹ Burakujweka orukinga rurungi aha mutwe burakutaho ekalinda nungi.”

¹⁰ Mwana wange, hulira ebigambo byange obikunde, nirwo oburora bwawe buliba bw'emyaka nyingi.

¹¹ Nkwegesize emigilire ey'obumanyi, nakurabya omu mihanda ey'obugorogoki.

¹² Orwo oragendaga, taliho kirakutangaga. Kandi k'orairukaga tolisitara.

¹³ Oyekwate eby'oyegesiibwe otabijajaaraho, obiteho omutima byonene ebyo nibwo burora bwawe.

¹⁴ Ababi otabarondora, kandi eby'abafakare bakora otabikora.

¹⁵ Oyelinde kukora kubi, okukora kubi okwelinde, okore ekisaine.

¹⁶ Ababi tibakunagira batakakozire kubi, kabatasitaize muntu oturo tubaguruka.

¹⁷ Okukora kubi nikyo kyakulya kyabo, obukatili niko k'okunywa kabo.

¹⁸ Kyonkai ebikorwa by'omugorogoki nibishusha emambya. Orwo emambya eshara obwire bugenda nibutaishukana kulemwa obwire kukya.

¹⁹ Ebikorwa by'ababi nibishusha omwilima lindindi, ebyo basitaraho tibabimanya.

²⁰ Mwana wange ohulilize ebigambo byange, ohulire ebyo ndikugamba.

²¹ Obyekomeleze, obite aha mutima.

²² Kuba abimanya bimuha oburora, bimukiza endwara zona.

²³ Oyelinde muno omu mitekelereze, kuba omwo nimwo hatabukwa enchuro z'oburora.

²⁴ Olekere kufumora ebya katozi, n'okufumora etabuli okuchwe.

²⁵ Lebera kimoi omu maisho, amaisho gawe obe niyo ogaikaza.

²⁶ Ebyo oraija kukora obanze obitekelezege, aho ebikorwa byawe biraba bili by'amazima.

²⁷ Oleke okutera oku n'oku, ekili kibi okitantare.