Emigani 30 - Ebibulia 2001

Ebyagambirwe Aguri

¹ Ebigambo ebi bikagambwa Aguri mutabani wa Yake, owa Masa. Akagambira Itieli na Ukali ati,

² “Mazima ndi mufera muno tinsaine kuba muntu, tinyina magezi nka ga muntu.

³ Obumanyi timbugira, kandi n'Omutakatifu timumanya.

⁴ N'ohai aratembire mw'iguru akashuba akasongoka? N'ohai arabumbatiire omuyaga omu kiganja? N'ohai arazingazingire amaizi omu mwendo? Ayatonzire ensi yona n'ohai? Eibaralye ab'ohai? Isi omutabani eibaralye n'ohai? Nobimanya!

⁵ Buli kigambo ekyo Ruhanga agamba akigobesheleza, wenene aba ngabo y'abamuhungiraho.

⁶ Ebigambobye otabishongonga, otaija okazoka nogamba bishuba akakukabukira.”

Emigani endijo

⁷ Waitu Ruhanga kankushabe ebintu bibili, obintunge ntakafire.

⁸ Onyihireho kimoi ebishuba n'amashwa, otampindura munaku anga mutungi, ongabire ekyakulya ekyo ndikwetaga,

⁹ ntaija nkaiguta nkakwetonga, nkagamba nti “Omukama n'ohai?” Kandi ntaba munaku nkaiba, nkahagaza eibara lya Ruhanga wange.

¹⁰ Otalilega mwiru ahali mukamawe, akaija akakukeena entambara ekakukwata.

¹¹ Haliho abakeena baishebo, kandi tibendera banyinabo mugisha.

¹² Haliho abebona bali nyamibwa, kyonkai okwo bahagaire tibezire.

¹³ Haliho abalerembura amaisho, bakashuba bakaleebesa eigayangane.

¹⁴ Haliho ab'amaino gashusha embanda, amaino gabo gashara bundi mihyo, basilikya abaanaku babamara omu nsi, n'abakene babachwa omu bantu.

¹⁵ Haliho omushundo ogwina abahara babili, nibagamba n'eiraka lihango bati, “Mpa, mpa!” Haliho ebintu bishatu ebitaiguta, kandi haliho n'ekya kanai ekitakushobora kugira kiti, “Nahaga.”

¹⁶ Sheoli, enda y'omugumba, ensi etahaga maizi, n'omuliro ogutagamba guti, “Naiguta!”

¹⁷ Elisho lijuma ishelyo, likanga kuhulira nyinalyo, nawe nilimujuma, ebikona by'omu rwota bililinonkoramu liliibwe empungu.

¹⁸ Haliho ebintu bishatu ebintangaza muno, kandi ebinai timbishobokerwa,

¹⁹ emiharalire y'enkwaju eiguru, emirabire y'enjoka aha rwazi, emigendere y'emeli omu nyanja engundu, n'entwaza y'omushaija aha mwisiki.

²⁰ Leba emigilire y'omukazi ensiyani, k'amara kulya ayeragaza aha munwa, amara agamba ati, “Tinyina kyonashobize.”

²¹ Ebintu bishatu bitengesa ensi, kandi ebinai toina kubyemera:

²² omwiru kuba mukama, n'omufera kulya akaiguta.

²³ Omukazi ow'orutwe kubona omushaija akashwerwa, n'omuzana kusikira mukamawe.

²⁴ Omu nsi omu ebintu ebike biba binai, kyonkai bigira obumanyi obushobeize:

²⁵ Omushwa ihanga litagira mani, kyonkai gumanya kubika ekyakulya ekyo guralya omu kyanda;

²⁶ ebikomakome ihanga elijege, kyonkai byombeka obuturo omu nyazi;

²⁷ enzige tizigira mukama, kyonkai zona zigenda omu bibina;

²⁸ omunyai wakugukwasa engaro, kyonkai gutuura omu bikare by'abakama.

²⁹ Haliho ebintu bishatu ebitambuka nibitengeijuka, nangu bili binai ebigenda nibyesitera:

³⁰ Entare, ekikaaka ky'amani okushaga byona, mara tetina kantu kushuba nyuma;

³¹ enkokoromi kutambukisa amani, n'empaya kutyo, n'omukama atambuka nayeshagara omu maisho g'embagaye.

³² K'oraba orabaire mufera okeshalingya, anga okukora kubi nikwo otura oyenda, teka engaro aha munwa.

³³ K'ochunda amata oihyamu amajuta, k'otera omuntu enyindo ejwa obwamba, kandi okunigaza omuntu kuzarukanwamu endwano.