Emigani 3 - Ebibulia 2001

Omuhano gw'abasigazi

¹ Mwana wange, ebyo nkwegesa otabyebwa, ebyo nkuragira obyekomye.

² Kuba k'orabikwata olibona oburora bw'ebiro bingi ebitali bike oshube ogire emilembe nyingi.

³ Ogume omu bwesigwa, obwekome omu ngoto, obuhandike aha mutima gwawe.

⁴ Kityo Ruhanga n'abantu balikusima bakushemelerwe.

⁵ Oyesige Omukama n'omutima gwawe gwona, otalyesiga bumanyi bwawe.

⁶ Omu by'orakoraga byona oijukega Omukama, na wenene arakwolekaga omuhanda ogw'amazima.

⁷ Otasima bumanyi, otine Omumama, oyelinde kukora kubi.

⁸ K'olikora otyo guliba mubazi gw'okukutambira omubili, n'okukugumisa amagufa.

⁹ Eitunga lyawe olikoze kukunisa Omukama, oshube omuganuze ahali buli kimoi eky'orayezaga,

¹⁰ esitoa zawe ziraikaraga zijwire, emuga zawe ziraijuraga edivai zisheshekane.

¹¹ Mwana wange otaligaya muhano gwa Mukama, anga kwirwa muhanogwe,

¹² aha rw'okuba Omukama ahana ow'alikugonza, nk'okwo ishe mwana ahana omwanawe owo alikwenda.

¹³ Muberwa omuntu aina obumanyi, nawe muberwa omuntu aina amagezi.

¹⁴ Ahakuba obumanyi bwina omugasho kushaga efeza, n'amagoba gagwo nigakira ezahabu.

¹⁵ Obumanyi bwina omugasho gungi kushaga obubare bw'eiguzi, taliho ky'olikwenda ekyakubwigana.

¹⁶ Obumanyi bulikubonesa oburora burai, bukuhaise eitunga n'ekitinwa.

¹⁷ Obumanyi bukoza ebilikushemera, bukoza n'eby'emilembe.

¹⁸ Obumanyi buba muti gw'oburora aha babwekwata, abatabuta betwa baberwa.

¹⁹ Omukama ensi akagitonza obumanyi, n'eiguru akalitonza amagezi,

²⁰ n'enyanja engundu elikuhinda akagitonza obumanyi, n'ebichwi ebirugwamu orume akabitonza obumanyi obwo.

²¹ Mwana wange, oyekwate obumanyi nyakabara n'amagezi, bitalikutaishukaho.

²² Bilikubera burora, n'omukofu gw'omu bikya.

²³ Aho oligendage, mara tolisitara.

²⁴ Orashuntamaga otalikutina, orwo orabyamaga oranagiragage.

²⁵ Ebibundo by'ekibwangu, ebitera ababi nk'enkoma bitakuhahanisa.

²⁶ Kuba Omukama alikwemera, kandi talikunda k'ogwa mu mutego.

²⁷ Abantu ebili byabo otalibibaima, orwo orabaga obikwasiibwe.

²⁸ Otagambira mutahi wawe oti, “Genda oragaruka, ndakuha nyenkya,” kandi okwo oinakyo.

²⁹ Otalitegeka kukora kubi mutahi wawe owomutwire hamoi nakwesiga.

³⁰ Orwo omuntu atakukoleire kubi, otahankana nawe bushai.

³¹ Omuntu engwakubi otalimuchubira, handiki kumurondora mu bigirobye,

³² kuba Omukama anoba omuntu mubi, kyonkai ayesiga omugorogoki.

³³ Eka y'omubi Omukama agiraama, kyonkai ey'omugorogoki agiha omugisha.

³⁴ Abaruulira banu abaruulira, kyonkai abetohya abagilira ekisha.

³⁵ Abamanyi balihabwa ekitinwa, kyonkai abafera balihemuka.